İranda həbsdə olan iki amerikalı səhhayın vəkili Məsud Şəfei bildirib ki, sənədə qol çəkəcək ikinci hakim məzuniyyətdən geri dönmədiyi üçün məhbuslar azad edilmirlər. Vəkil deyib ki, Coş Fattal və Şon Bauerin azad edilmələri üçün 1 milyon dollar ödədikdən sonra sənədlərin imzalanması üçün bu gün məhkəməyə gedib. Orada ona hakimin hələ gəlmədiyini bildiriblər. Məhkəmədə hakim gələn kimi ona zəng ediləcəyini desələr də o, Reuters xəbər agentliyinə yaxın zamanlarda ona heç kimin zəng etməyəcəyinə əmin olduğunu deyib.
