Yəmən paytaxtı Sənada minlərlə nümayişçi prezident Əli Abdullah Salehi istefa verməyə çağırıb. Aksiya iştirakçıları Misirin Sənadakı səfirliyinə doğru irəliləmiş və yolda hökumətpərəst adamlarla toqquşmuşlar. İnsanlar ən çox Səna Universitetində və Qahirədəki məşhur meydanla eyni adı daşıyan Təhrir meydanında toplaşıblar.
Misirin sabiq lideri Hüsni Mübarək kimi prezident Əli də artıq 30 ildən çoxdur ki, hakimiyyətdədir. Etiraz dalğasını yatırtmaq üçün o, 2013-cü ildə istefa verəcəyini vəd edib.
Bu arada Əlcəzair paytaxtına 30,000 polis çıxarılıb. Hökumət bu tədbirləri potensial nümayişlərin qarşısını almaq üçün görüb. Bununla belə küçələrə 2,000-ə yaxın adam çıxıb. Belə ki, siyasi fəallar 19 il sürən fövqəladə vəziyyətin ləğv edilməsini tələb edirlər. Misirdə olduğu kimi uzunmüddətli fövqəladə vəziyyətin qüvvədə qalması hökumətə siyasi məhdudiyyətləri yerində saxlamağa imkan verir. Hökumət fövqəladə vəziyyəti gələcəkdə ləğv etməyə söz verib.
Bəhryendə də siyasi fəallar hökumət əleyhinə kütləvi aksiyalara çağırıblar. Narazı vətəndaşların könlünü almaq üçün kral hər bir Bəhreyn vətəndaşına min dollar pul ödəyəcəyini elan edib. O, bunu monarxiyanın "Bəhreyn xalqına hörmətinin əlaməti" kimi dəyərləndirir.