Amerikanın ExxonMobil neft şirkəti Bakı-Tbilisi-Ceyhan (BTC) neft kəmərini idarə edən BTC Co. səhmdarlarının tərkibinə daxil olub. Bu barədə BP-nin 2017-ci ildə Azərbaycanda fəaliyyətinin yekunlarına dair hesabatında deyilir.
Turan agentliyi bildiirir ki, ExxonMobil CIECO şirkətinin 2,5% səhmini alıb. Sövdələşmə artıq baş tutub.
CIECO (Yaponiyanın ITOCHU şirkətinin törəməsi) 2015-ci ilin üçüncü rübündə BTC neft kəmərində Amerikanın ConocoPhillips şirkətinin 2,5% payını almışdı.
2003-cü ildə BТС Со. boru kəməri şirkəti təsis ediləndə ExxonMobil Bakı-Ceyhan kəmərini kommersiya baxımından riskli layihə hesab edərək ora daxil olmamışdı. Odur ki, 2006-cı ildən Amerika şirkəti "Azəri" və "Dərin sulu Günəşli" yataqlarından hasil edilən neftdən öz payını dünya bazarına Bakı-Batumi dəmir yolu vasitəsilə nəql edirdi.
Layihənin reallaşması üçün 2002-ci ilin avqustunda təsis edilən BTC Co-nun digər səhmdarları BP (30,1%), AzBTC (25%), Chevron (8,9%), Statoil (8,71%), ТРАО (6,53%), Eni (5%), Total (5%), Itochu (3,4%), Inpex (2,5%) və ONGC-dir (2,36%).
