Birləşmiş Ştatların xəbər agentlikləri Suriyanın şimal-qərbindəki İdlib vilayətində yüz minlərlə mülki vətəndaşın humanitar böhranla üzləşdiyini və təcili yardıma ehtiyacları olduğunu bildirir. BMT-nin bildirdiyinə görə, qarşıdan gələn 6 ay ərzində 800 min insana yardım üçün 336 milyon dollar lazımdır.
İdlibin 3 milyondan çox sakini döyüşlərdən qorxduqları üçün daim bir yerdən başqa yerə qaçmalı olur. Suriya və onun rus müttəfiqi tərəfindən amansız bombalanmlar on minlərlə insanı sığınacaq tapmaq üçün qaçmağa məcbur edir. Lakin bölgədə təhlükəsiz zonalar yoxdur.
Suriya ilə həmsərhəd ölkələr dəfələrlə sərhədlərini bağlayıb və zorakılıqlara məruz qalan insanların başqa yollar axtarmağa məcbur edib.
ABŞ-ın Humanitar Məsələlərin Əlaqələndirilməsi Bürosunun sözçüsü Yens Lerke əksəriyyəti qadınlar və uşaqlar olmaqla, yarım milyondan çox insanın evlərindən didərgin düşdüyünü deyib. Onun dediyinə görə, çoxları əyinlərindəki paltarlardan başqa heç nə götürə bilməyib.
"Onlar İdlibdə təhlükəsiz yerlərin olmadığını deyirlər. Bomba hər yerə düşür. Hətta cəbhə bölgələrindən qaçqınlar da təhlükəsiz deyillər. Son iki ayda hava zərbələri və atəş dayanmadan davam etdiyi üçün insanlar bütün istiqamətlərdə hərəkət edir" - deyə, o bildirib.
BMT-nin İnsan Haqları Bürosu 10 gün ərzində, yanvarın 20-si ilə 30-u arasında 20 qadın, 33 uşaq daxil olmaqla, azı 83 mülki vətəndaşın öldürüldüyünü bildirib. Agentliyin bildirdiyinə görə, son 9 ayda döyüşlərin artması 1500-dən çox mülki şəxsin ölümünə səbəb olub. Suriya qüvvələri ölkədə son üsyançı basqını olan İdlib şəhərini üsyançılardan geri almaq üçün genişmiqyaslı hücumlara başlayıb.
