Azərbaycan və İran keçən ay ortaq sərhəd yaxınlığında keçirilən təlimlər və İsrailin Azərbaycanda hərbi mövcudluğu ehtimalı ilə bağlı yaranan diplomatik gərginliyi dialoq yolu ilə həll etmək barədə razılığa gəlib.
Hər iki tərəf gərginliyi azaltma səylərini oktyabrın 13-də, Azərbaycanın xarici işlər naziri Ceyhun Bayramovla İranın xarici işlər naziri Hüseyin Əmir-Abdullahianın bir gün əvvəl telefon söhbətindən sonra elan edib.
"Tərəflər son ritorikanın ikitərəfli münasibətlərə zərər vurduğunu və hər bir fikir ayrılığının dialoq yolu ilə həll edilməli olduğunu qeyd edib" - deyə, Azərbaycan Xarici İşlər Nazirliyinin bəyanatında bildirilib.
Sentyabr ayında İran keçən il Dağlıq Qarabağ ərazisi uğrunda Ermənistanla gedən gərgin döyüşlər zamanı düşmən İsrailin pilotsuz uçuş aparatlarından istifadə etdiyinə görə Azərbaycanı bəzi qeyri-müəyyən hərəkətləri ilə təhdid edib. Bakı ölkədə İsrailin hərbi varlığını inkar edir.
Bundan sonra İran ordusu Azərbaycanla sərhəd yaxınlığında geniş hərbi təlimlər keçirərək, gərginliyi daha da artırıb.
Azərbaycan hökumətinin İranın Ermənistana gedən yük maşınlarına gömrük rüsumu tətbiq etməsi münasibətləri bir az da pisləşdirib.
İranın Xarici İşlər Nazirliyi oktyabrın 13-də Əmir-Abdullahian hər iki tərəfin "anlaşılmazlıqların qarşısını almaq və münasibətləri gücləndirmək" istədiyini vurğulayıb.
"Tehran və Bakının düşmənləri var və iki hökumət onlara münasibətləri pozmaq imkanı verməməlidir" - deyə, Əmir-Abdullahian bildirib.
Azərbaycanın Dağlıq Qarabağ ərazisi və qonşu rayonlarla bağlı onilliklərdir davam edən "dondurulmuş münaqişəsi"ndə Tehranın Ermənistanı dəstəkləməsi çoxdandır Bakının diqqət mərkəzindədir.
