ABŞ hökuməti dünya liderlərilə Suriyada keçən həftə kimyəvi hücumla əlaqədar hücum planını müzakirə edir.
Ağ Ev bildirir ki, prezident Barak Obama mümkün hücum və buna dəstək verəcək koalisiya təşkil etmək məqsədilə Britaniyanın Baş naziri Deyvid Kameron, Fransa prezidenti Fransua Hollande, Kanadanın baş naziri Stiven Harper və Avstraliyanın Baş naziri Kevin Ruddla telefon söhbəti aparıb.
Qərb liderləri Suriya prezidenti Bəşar Əl-Əsədi avqustun 21-i üsyançıların bildirdiyinə görə yüzlərlə insanın ölümülə nəticələnmiş kimyəvi hücuma görə kəskin tənqid edib. Ağ Evin sözçüsü Cey Karni bildirib ki, Britaniya kimyəvi hücumun dəhşətli mahiyyət daşıdığı ilə bağlı Birləşmiş Ştatlarla eyni fikri bölüşür.
Onun sözlərinə görə, cənab Obama hələlik mümkün hücumla bağlı qərar verməyib.
