Rəsmi səfərlə Misirdə olan ABŞ dövlət katibi Hillari Klinton keçən ay ölkə lideri Hüsnü Mübarəkin istefası ilə nəticələnən etiraz aksiyalarının keçirildiyi Qahirənin Təhrir meydanını gəzib. “Burada olarkən azadlıq, demokratiya və insan haqlarının müdafiəsini tələb edən insanların gücünü hiss edirsən” deyə, xanım Klinton bildirib. Misirin baş naziri Essam Şərəflə görüşündən əvvəl şəhər sakinləri xanım Klintonu səmimiyyətlə qarşılamış, onun əlini sıxmışlar.
ABŞ dövlət katibi Hillari Klintonun Misirə iki günlük səfəri zamanı yeni hökumətlə irəliyə doğru addımlar və demokratik islahatlar kimi məsələlər müzakirə edilir.