Rusiyanın Gürcüstandakı hərbi əməliyyatları zamanı yaralananlar arasında azərbaycanlı da var.
Bu barədə "Amerikanın Səsi"nə ANS TV-nin Tbilisidəki müxbiri Nadir Almazoglu məlumat verib.
O deyib ki, gözündən yaralanmış şəxs Gürcüstan ordusunun əsgəridir. Babək Əhmədov Qardabani rayonunun Nəzərli kəndində yaşayır.
Müharibə zamanı ölənlərin şəxsiyyəti barədə isə heç bir rəsmi məlumat yoxdur.
Hazırda Azərbaycan-Gürcüstan sərhəddində olan jurnalist onu da deyib ki, sərhəddə sıxlıq yaranıb. Onun sözlərinə görə, Bakıya üz tutanlar əsasən hərbi qarşıdurmadan əvvəl Gürcüstana gəlmiş turistlər və xarici vətəndaşlardır.
Müxbir habelə bildirib ki, Cənubi Osetiyada birləşmiş rus-osetin ordusu münaqişə bölgəsində dinc sakinləri əsir götürür və ticarət məntəqələrinə hücumlar edir.