Fevralın 25-də “İşçi Masası” Həmkarlar İttifaqları Konfederasiyasının üzvü Möhyəddin Orucovun cinayət işi üzrə son məhkəmə iclası baş tutub. Bakı Ağır Cinayətlər Məhkəməsində baş tutan iclasda Orucova 3 il hökm oxunub.
Orucov istintaq dövründə Cinayət Məcəlləsinin 234.4.3-cü maddəsi ilə (satış məqsədilə külli miqdarda narkotik əldə etmə, daşıma, saxlama) ittiham olunsa da, hökmdə satışla bağlı ittiham çıxarılıb. Bundan əvvəl fevralın 18-də baş tutan iclasda prokuror satışla bağlı ittihamın sübuta yetirildiyini iddia etmiş və Orucova 7 il iş istəmişdi.
Məhkəmədə Orucovun 2023-cü ilin dekabrındakı saxlanma anının videogörüntüsünə baxılıb. Saxlanma protokolunda gənc fəalın saat 13.00 radələrində saxlandığı qeyd olunsa da, görüntünün saat 19.00 radələrinə aid olduğu görünür. Orucovun vəkili Nazim Musayev bu ziddiyəti məhkəmənin diqqətinə çatdırıb.
Orucov çıxışında görüntülərdəki narkotik maddənin ona aid olmadığını deyib. O bildirib ki, əvvəlcə 2023-cü ilin oktyabrında anbardar işlədiyi transfarmator zavodunda hüquqların pozulmasından şikayət etdiyinə görə polisə tabe olmamaq adı ilə 1 aylıq inzibati həbs olunub. Həbsdən çıxdıqdan sonra saxlandığı polis bölməsində ona qarşı zorakılıqları ictimailəşdirdikdən sonra cinayət işi açılıb və uzunmüddətli həbs olunub.
“İşçi Masası” Həmkarlar İttifaqları Konfederasiyası (HİK) Möhyəddin Orucov barəsində açılmış cinayət işini və ona oxunan hökmü sifarişli və saxta hesab edir. Bu barədə Amerikanın Səsinə “İşçi Masası” HİK-in İdarə Heyətinin üzvü Tural Fərzili deyib.
“Demək olar ki, 1 il ərzində bütün məhkəmə prosesini yaxından izlədik. Vəkilin bu cinayət işinin saxta olması ilə bağlı onlarla dəlil və sübutlar irəli sürməsinə baxmayaraq, verdiyi bütün vəsatətlər geri çevrildi. Möhyəddin də bu qədər dəlilin olmasına baxmayaraq, hələ də barmaqlıqlar arxasında olduğu üçün məhkəmədən ədalətli hökm gözləmədiyini, məhkəmənin bir teatr, bir oyun olduğunu dedi”, o qeyd edib.
Orucovdan başqa, “İşçi Masası” HİK-in sədri və iki üzvü də həbsdədir. Konfederasiyanın sədri Afiyəddin Məmmədov 2023-cü ilin avqustunda polisə müqavimət və xırda xuliqanlıq ittihamları ilə bir aylıq inzibati həbs edilib. Həbsdən buraxılandan bir müddət sonra bu dəfə Cinayət Məcəlləsinin 126.2.4-cü (xuliqanlıq niyyəti ilə qəsdən bədənə ağır xəsarət yetirmə) və 221.3-cü (silah qismində əşyadan istifadə etməklə xuliqanlıq) maddələriylə uzunmüddətli həbs olunub. Məmmədova bu ittihamlar üzrə bu il yanvarın 14-də 8 il hökm oxunub.
“İşçi Masası” nın üzvləri Elvin Mustafayev və Ayxan İsrafilov 2023-cü ilin avqustunda narkotik ittihamı ilə həbs ediliblər. Hər ikisinə 3 il hökm oxunub.
“Azərbaycanda Siyasi Məhbusların Azadlığı Uğrunda” İttifaqın fevral ayında hazırladığı ölkədəki siyasi məhbusların yeni siyahısına əsasən Azərbaycanda 357 siyasi məhbus var. Azərbaycan hökuməti isə ölkədə siyasi məhbus kimi tanınan şəxslərlə bağlı beynəlxalq tənqidləri qəbul etmir və qərəzli sayır. Hökumət rəsmiləri Azərbaycanda insanların siyasi baxışlarına görə təqib edilmədiyini və bütün fundamental hüquqların tam təmin edildiyini bəyan edir.
Forum