Yanvarın 31-də Bakının Nəsimi Rayon Məhkəməsi hakim Anar İbadzadənin sədrliyi ilə ictimai fəal Cəlal Cavadovu 30 sutka inzibati həbsə məhkum edib. O İnzibati Xətalar Məcəlləsinin 206-cı maddəsi (Qanunsuz olaraq narkotik vasitələrin, psixotrop maddələrin istehlakı, satış məqsədi olmadan az miqdarda hazırlanması, əldə edilməsi, saxlanılması, daşınması və ya göndərilməsi) ilə günahlandırılıb.
Vəkil Zibeydə Sadıqova Amerikanın Səsinə bildirib ki, məhkəmə iclasından öncə Nəsimi Rayon Məhkəməsinə Cavadovun vəkili olması ilə bağlı örderini təqdim etməsinə baxmayaraq onu məhkəmədə fəalın müdafiəsinə buraxmayıblar.
Vəkil fevralın 3-də saxlanma yerində Cəlal Cavadovla görüşəcəyini və məhkəmənin qərarından apellyasiya şikayəti verəcəyini bildirib.
Cəlal Cavadov yanvarın 30-da saxlanılıb. Onun saxlanılması ilə bağlı ailəsinə və vəkilinə məlumat verilməyib.
Cavadov yanvarın 29-da bələdiyyə seçkiləri zamanı seçki qutusuna “Meydan TV”nin həbs edilmiş jurnalistlərinin fotoşəkillərini atdıqdan sonra saxlanılıb.
Forum