"Formula 1" üzrə 2025-ci ildə keçiriləcək Azərbaycan Qran-prisinin vaxtı açıqlanıb.
Bu barədə Beynəlxalq Avtomobil Federasiyası (FIA) "Formula 1" üzrə 2025-ci il dünya çempionatının təqvimində qeyd edilib.
Bakının 9-cu dəfə ev sahibliyi edəcəyi bu yarış sentyabrın 19-21-də reallaşacaq. Bu, mövsümün 17-ci Qran-prisi olacaq.
Martın 14-16-sı aralığında Avstraliya Qran-prisi ilə start götürəcək mövsüm 5-7 dekabrda Birləşmiş Ərəb Əmirliklərinin paytaxtı Əbu-Dabidə yekunlaşacaq.
“McLaren” komandasının avstraliyalı pilotu Oskar Piastri ötən ilin sentyabrın 15-də Bakıda keçirilən "Formula 1" üzrə Azərbaycan Qran-Prisinin qalibi olub. Şarl Lekler (“Ferrari”) ikinci, Corc Rassell (“Mercedes”) üçüncü olub.
Azərbaycan 2016-cı ildən dünyanın bu nüfuzlu avtoidman yarışına ev sahibliyi edir. Ölkədə təşkil olunan ilk "Formula 1" yarışı Avropa Qran-Prisi adlandırılıb. Həmin yarışda almaniyalı Niko Rosberq birinci olub. Növbəti illərdə müvafiq olaraq Daniel Rikkardo (Avstraliya), Luis Hamilton (Böyük Britaniya), Valtteri Bottas (Finlandiya), Serxio Peres (Meksika) və Maks Ferstappen (Niderland) bütün rəqiblərini qabaqlayaraq podiumun ən yüksək pilləsinə qalxıblar.
Yalnız 2020-ci ildə Azərbaycan Qran-Prisi koronovirus pandemiyası səbəbindən keçirilməyib.
2016-cı ildən bəri keçirilən "Formula-1" Azərbaycan Qran-Prisi daha üç il uzadılaraq, 2026-cı ilədək keçiriləcək.
Əhalinin müəyyən hissəsində yarışların keçirilməsi narazılığa səbəb olsa da, hökumət "Formula-1"in dövlət üçün vacib olduğunu deyir.
Nəqliyyat eksperti Rauf Ağamirzəyevin fikrincə, Bakıda hər hansı tədbir olmasa belə, nəqliyyat sistemi rahat istifadə üçün əlverişli deyil.
Ekspert hesab edir ki, paytaxtda çeşidli nəqliyyat növlərinə ehtiyac var, bu, olmadığı müddətdə tıxaclara və insanların narazılığına səbəb olacaq.
Forum