Cənubi Koreyanın Birləşmiş Qərargahı bazar ertəsi günü bildirib ki, Şimali Koreyanın Ukraynadakı müharibəyə dəstək məqsədi ilə daha çox hərbçi və silah göndərməyə hazırlaşdığına dair göstəricilər var.
“Hazırda hazırlanmaqda olan əlavə silahlar arasında kamikadze dronları da yer alır və Şimali Koreya artıq Rusiyaya 240 mm-lik raket atıcıları və 170 mm-lik özüyeriyən artilleriya göndərib” - deyə, Birləşmiş Qərargah açıqlamasında bildirib.
Cənubi Koreya, ABŞ və Ukraynanın məlumatına görə, Şimali Koreya artıq təxminən 12 000 hərbçi göndərib.
Birləşmiş Qərargah bazar ertəsi bildirib ki, Şimali Koreyanın ən azı 1100 hərbçisi öldürülüb və ya yaralanıb.
Ukrayna ordusu bildirib ki, o, Rusiyanın ölkənin bir neçə bölgəsini hədəf alan gecə hücumlarında 47 hava dronunu vurub.
Ukrayna hava qüvvələri bildirib ki, Rusiya son hücumunda ümumilikdə 72 drondan istifadə edib.
Ukraynanın hava müdafiə sistemləri Çerkası, Çerniqiv, Xarkiv, Xmelnitski, Kyiv, Odesa, Poltava, Sumı və Jitomir bölgələrində dronları məhv edib.
Xmelnitski vilayətinin qubernatoru Serhiy Türyn Telegram-da bildirib ki, dron hücumları bir iş yerinə və bəzi evlərə ziyan vurub, bir nəfər isə yaralanıb.
Rusiya Müdafiə Nazirliyi bazar ertəsi günü bildirib ki, o, Bryansk bölgəsində Ukraynanın hava dronunu məhv edib. Bu bölgə Rusiya ilə Ukrayna sərhədi boyunca yerləşir.
Bryansk vilayətinin qubernatoru Aleksandr Boqomaz Telegram-da bildirib ki, Ukraynanın hücumundan zərər və ya tələfat barədə məlumat yoxdur.
Forum