"Abzas Media"nın əməkdaşı, jurnalist Elnarə Qasımovanın saxlanıldığı 1 saylı Bakı İstintaq Təcridxanasında ailəsi ilə canlı görüşə icazə verilmədiyi bildirilir. Bu barədə onun anası Natavan Qasımova məlumat verib.
Onun sözlərinə görə, son parlament seçkilərinə qədər canlı görüşlərdə heç bir problem olmayıb, ancaq seçkilərdən sonra vəziyyət dəyişib: "Gedəndə qələm, kağız da aparıb istədiklərini yaza bilirdik. Ancaq seçkilərdən və o təcridxanada qadına işgəncə verilməsilə bağlı xəbərlərdən sonra canlı görüşə icazə vermədilər, içəri qələm, kağız aparmağa qoymadılar".
Natavan Qasımova bildirir ki, təzyiqlər təkcə görüş qadağası ilə məhdudlaşmır, şüşə arxasından görüş zamanı da nümayişkəranə şəkildə nəzarətə məruz qalırlar.
"Oktyabrın 12-də həbsxanaya gedəndə bir xanım işçi görüşün sonuna qədər başımızın üstündə durdu. Mən digər nəzarətçilərə narazılıq edəndə dedilər ki, ona elə tapşırıq verilib. Soruşdum bəs qələmi, vərəqi niyə buraxmırsınız? Dedilər, vərəq olar, qələm yox, bizə belə tapşırıq verilib" - deyə, Natavan Qasımova qeyd edib.
Bundan öncə “Abzas Media”nın baş redaktoru Sevinc Vaqifqızının anası Ofelya Məhərrəmova da eyni qadağa ilə üzləşdiklərini bildirib. Anasının sözlərinə görə, digər məhbusların ailə üzvləri onlarla maneəsiz görüşür, lakin Sevinc Vaqifqızının hüquqları pozulur və o, ayrı-seçkiliyə məruz qalır.
"Parlament seçkilərdən sonra Sevinclə canlı görüşə bilməmişəm. Sevincə içində mahnılar olan yaddaş kartı aparmışdım, onu da buraxmadılar. Bütün məhbusların ailələrinə rahat olan şeyləri bizim üçün qadağan ediblər. Təcridxananın rəisi Elnur İsmayılov mənə dedi ki, "Sevinc son parlament seçkilərində təcridxanada əcnəbi vətəndaşların da səs verdiyini ictimailəşdirdiyi üçün cəzalandırılır". Rəis deyib ki, "gedin hara nə istəyirsiniz yazın, vecimə də deyil" - deyə, Ofelya Məhərrəmova qeyd edib.
Hüquqşünas Səməd Rəhimli Amerikanın Səsinə bildirib ki, "Həbs yerlərində saxlanılan şəxslərin hüquq və azadlıqlarının təmin edilməsi haqqında" Qanunun 15.2.1-ci maddəsinə əsasən həbs edilmiş şəxslərin hüquqlarından biri qanunvericiliklə nəzərdə tutulmuş qaydada yaxın qohumları və əlaqə saxlaması onun üçün qanuni maraq doğuran digər şəxslərlə görüşmək hüququdur.
Hüquqşünasın sözlərinə görə, həmin qanuna əsasən həbs edilmiş şəxslərin yaxın qohum və qanuni maraq doğuran digər şəxslərlə görüşmək hüququ ayda dörd dəfə 4 saatadək müddətə ləyaqətli şəraitdə və nəzarət altında həyata keçirilir.
"Həbs edilmiş şəxsin görüş hüququnun həyata keçirilməsi detallı şəkildə Həbs yerlərinin Daxili İntizam Qaydaları ilə tənzimlənir. Görüşlərin keçirilməsi qaydaları Daxili İntizam Qaydalarının 19-cu bəndinə uyğun olaraq yerinə yetirilir. Həmin Qaydalara əsasən görüş hüququ istintaq təcridxanasının görüş otağında həyata keçirilir. Görüş otaqları həmin Qaydalara uyğun inventarla təmin edilir. Görüş otaqlarının inventarla təchiz edilməsi həmin Qaydalara 11-ci əlavəyə uyğun formalaşdırılır. Görüş otaqlarının inventar təchizatı qaydasına əsasən otaqda bir-birindən döşəmədən tavanadək şüşələnmiş arakəsmələrlə ayrılan 80 sm enində və 100 sm uzunluğunda kabinələr təşkil olunur. Bu inventar təchizat qaydalarına uyğun olaraq görüş otaqlarında görüş şüşə arakəsməli kabinlər vasitəsilə yerinə yetirilir. Lakin istintaq təcridxanalarının ümumi təcrübəsibdən bəllidir ki, şüşə arakəsmələr olmayan canlı görüşlərin keçirilməsinə imkan yaradan görüş otaqları mövcuddur". Rəhimli qeyd edir ki, daxili intizam qaydalarında müəyyən edilən normalarla yanaşı, həbs edilmiş şəxslərin yaxın qohumları ilə canlı və birbaşa ünsiyyətlə görüşməsinə imkan yaradan görüş otaqları üzrə inzibati praktika var.
Məsələ ilə bağlı 1 saylı Bakı İstintaq Təcridxanasından və Penitensiar Xidmətdən mövqe almaq mümkün olmayıb.
Oktyabrın 4-də həyat yoldaşı Rübabə Quliyeva Ülvi Həsənlinin həbsxanada qeyri-insani rəftara məruz qaldığını bildirib.
Avqustun 21-də isə Rübabə Quliyeva sosial şəbəkələrdə Ülvi Həsənlinin həyatına təhlükə olduğu barədə məlumat yayıb.
Həmin dövrdə Penitensiar Xidmət iddianı təkzib edib.
“Abzas Media" işi ilə bağlı nə baş verib?
"Abzas Media" ilə bağlı cinayət işi üzrə saytın direktoru Ülvi Həsənli ötən ilin noyabrın 20-də həbs olunub. İstintaqın həmin gün onun evində və "Abzas Media"nın ofisində axtarış apardığı və ofisdən 40 min avro pul tapıldığı bildirilib.
Daha sonra noyabrın 20-də direktor müavini Məhəmməd Kekalov, 21-ə keçən gecə xaricdən qayıdanda hava limanında saytın baş redaktoru Sevinc Vaqifqızı həbs olunub. Həmin iş üzrə jurnalistlər Nərgiz Absalamova, Elnarə Qasımova və araşdırmaçı jurnalist Hafiz Babalı da həbs olunub.
Mayın 30-da isə "Abzas Media" işi üzrə iqtisadçı Fərid Mehralızadə saxlanılıb. İyunun 1-də Xətai Rayon Məhkəməsi iqtisadçı barəsində 3 ay 20 gün müddətinə həbs qətimkan tədbiri seçib. Mehralızadə məhkəmədə təqsiri olmadığını və "Abzas Media" ilə heç bir işgüzar fəaliyyətinin olmadığını deyib.
Onların hamısına Cinayət Məcəlləsinin 206.3.2-ci (öncədən əlbir olan bir qrup şəxs tərəfindən qaçaqmalçılıq) maddəsi ilə ittiham verilib. Bu ilin avqust ayında isə "Abzas Media işi" üzrə həbs olunanlara qarşı 7 maddə ilə əlavə ittihamlar irəli sürülüb.
Onlar Cinayət Məcəlləsinin 192.3.2-ci, 193-1.3.1-ci, 193-1.3.2-ci, 206.4-cü, 320.1-ci və 320.2-ci, 213.2.1-ci maddələri ilə (xüsusilə külli miqdarda gəlir əldə etməklə qanunsuz sahibkarlıq, mütəşəkkil dəstə şəklində cinayət yolu ilə əldə edilmiş xeyli miqdarda pul vəsaitlərini leqallaşdırma, mütəşəkkil dəstə tərəfindən törədilmiş qaçaqmalçılıq, sənəd saxtalaşdırma və saxta sənədlərdən istifadə etmə, mütəşəkkil dəstə halında vergi ödəməkdən yayınma) maddələri ilə ittiham olunurlar.
Sentyabrın 9-da "Abzas Media işi" üzrə həbsdə olan şəxslərin ibtidai istintaqının yekunlaşdırıldığı bildirilir. "İndi bütün təqsirləndirilən şəxslər və onların vəkilləri ayrı-ayrılıqda istintaq materialları ilə tanış olacaq. Daha sonra iş baxılması üçün məhkəməyə göndəriləcək", vəkil Elçin Sadıqov Amerikanın Səsinə bildirib.
Həmin iş üzrə bir sıra vətəndaş cəmiyyəti nümayəndəsi müxtəlif vaxtlarda Bakı Şəhər Baş Polis İdarəsində şahid qismində dindirilib, daha sonra sərbəst buraxılıblar.
Həbs olunanların heç biri özünü təqsirli bilmir, həbslərinin peşə fəaliyyətləri ilə bağlı olduğunu deyir.
Beynəlxalq media müdafiə təşkilatları Azərbaycan hakimiyyətini saxlanan jurnalistləri dərhal azad etməyə, müstəqil mediaya təzyiqləri dayandırmağa çağırıb.
Azərbaycan hakimiyyəti isə ölkədə insanların siyasi baxışlarına görə təqib edilmədiyini və bütün fundamental hüquqların tam təmin edildiyini bəyan edir.
Forum