Amerika Birləşmiş Ştatlarının Azərbaycandakı səfiri Mark Libbi (Mark Libby) Anım Günü ilə bağlı Şəhidlər xiyabanını ziyarət edib.
Bu barədə səfirliyin X hesabında paylaşım edilib.
O, həmçinin “Əbədi məşəl” abidəsinin önünə əklil qoyub.
"Bu gün biz Azərbaycan və Ermənistan arasında onilliklər boyu davam edən münaqişə zamanı həyatını itirən azərbaycanlıların xatirəsini ehtiramla yad edirik. Birləşmiş Ştatlar Cənubi Qafqazda sülhün, uzlaşmanın və sabitliyin möhkəmləndirilməsinə sadiq qalmaqdadır. Biz regionun bütün xalqlarının rifahı naminə humanitar yardım, minaların təmizlənməsi və davamlı və layiqli sülh sazişinin əldə edilməsi səylərini dəstəkləməyə davam edirik", ABŞ səfiri Mark Libbi qeyd edib.
ABŞ-ın Ermənistandakı səfiri Kristina Kvien Yerevanda Yerablur hərbi məzarlığını ziyarət edib.
Səfirliyin yaydığı bəyanatda Kvienin onilliklər boyu davam edən münaqişə zamanı həyatını itirən ermənilərin xatirəsini ehtiramla yad etdiyi bildirilib.
Sentyabrın 26-da Nyu-Yorkda ABŞ Dövlət katibi Antoni Blinkenin təşəbbüsü ilə Azərbaycan xarici işlər naziri Ceyhun Bayramovla Ermənistan xarici işlər naziri Ararat Mirzoyan arasında görüş keçirilib.
Görüş BMT Baş Assambleyasının 79-cu sessiyası çərçivəsində baş tutub.
"Tərəflər mümkün qısa müddət ərzində Sülhün və dövlətlərarası münasibətlərin təsis edilməsi haqqında Sazişin yekunlaşdırılması üçün əlavə səylərin göstərilməsi barədə razılığa gəliblər," hər iki ölkənin xarici işlər nazirliklərinin yaydığı bəyanatda bildirilib.
Forum