Avqustun 7-də Bakı Ağır Cinayətlər Məhkəməsində Gədəbəyin Söyüdlü kəndində etirazlar zamanı qaldırılan plakatları hazırlayan kənd sakini Coşqun Musayev 3 il müddətinə azadlıqdan məhrum edilib.
Məhkəmə ona verilən Cinayət Məcəlləsinin 234.4.3-cü (satış məqsədilə külli miqdarda narkotik əldə etmə, daşıma, saxlama) maddəni tövsif edib. Ona Cinayət Məcəlləsinin 234.1-1-ci (satış məqsədi olmadan külli miqdarda narkotik əldə etmə, daşıma, saxlama) maddəsi ilə hökm oxunub.
İttihama görə, Baş Mütəşəkkil Cinayətkarlıqla Mübarizə İdarəsinin ("Bandotdel" kimi tanınır) əməkdaşları Musayevi Nərimanov parkında şübhəli şəxs kimi saxlayıb və idarədə onun üstünə baxış keçirilərkən cibindən 6 qramdan çox narkotik tapılıb.
Kənd sakini məhkəmədə bildirib ki, onu Söyüdlü etirazlarındakı plakatlara görə cəzalandırırlar deyə narkotiklə şərləyirlər. Musayev deyib ki, Bakıda həbs olunmasından tutmuş, cibindən narkotik çıxmasınadək cinayət işində yazılanların hamısı yalandır. O, narkotikin onun cibinə "Bandotdel"də qoyulduğunu qeyd edib.
Mobil telefonların alqı-satqı və təmiri ilə məşğul olduğunu deyən Musayevin sözlərinə görə, onu Söyüdlü etirazlarından bir gün sonra – iyunun 21-də Gəncədə "satdığı telefonlardan birinin oğurluq çıxması" adı ilə saxlayıblar. Daha əvvəl isə Dövlət Təhlükəsizliyi Xidmətinin (DTX) Gəncə şöbəsinə, oradan da Bakıya - "Bandotdel"ə aparıblar.
Kənd sakini bildirib ki, narkotiki də cibinə "Bandotdel"də qoyublar, təzyiq ilə müxtəlif sənədlərə imza atdırıblar:
"Gəncədə DTX-nın binasında üstümü yoxlamışdılar, narkotik olsaydı, elə orada çıxardı. Məni "Bandotdel"də bir gecə saxlayandan sonra səhər Nərimanov parkına apardılar. Orada əvvəlcədən öyrətdikləri kimi oturdum, kənardan çəkiliş elədilər. Sonradan bildim ki, mənim guya Bakıda parkda tutulduğumu sübut eləmək üçün ssenari qurublar".
Onun sözlərinə görə, plakatlar, başqa növ çap məhsulları hazırlamaq onun işinin tərkib hissəsidir.
"İndiyədək Qarabağ döyüşlərində həlak olanların fotoları, Söyüdlünün tarixi, elm adamları haqqında da çoxsaylı plakatlar hazırlamışam" - deyə, o, məhkəmədə bildirib.
O, təqsirsiz olduğunu qeyd edib. Himayəsində iki azyaşlı uşağının olduğunu hakimlərin nəzərinə çatdıraraq onlardan ədalətli hökm çıxarmalarını istəyib.
Ötən il iyunun 20-də Söyüdlü sakinləri "Gədəbəy" yatağından qızıl hasilatı və emalı şirkətinin çirkab suları üçün ikinci süni gölün qurulmasına etiraz ediblər. Polis etirazlara müdaxilə edib, nəticədə 10 nəfərə yaxın şəxsin xəsarət aldığı və rəsmi olaraq 5 nəfərin inzibati həbs olunduğu açıqlanıb. Daha dörd nəfər kənd sakini haqqında isə narkotik ittihamı ilə cinayət işi başlanıb.
Sakinlər həmin süni gölün suyunda sianid olduğunu və kəndin içməli suyuna qarışdığını, nəticəsində də insanların sağlamlığına mənfi təsir etdiyini bildirirdilər.
Etiraza səbəb olan süni göl kənddəki ikinci oxşar su hövzəsi olacaqdı.
Sakinlər bildirirlər ki, 2012-ci ildə kəndlərinin yaxınlığında qızıl mədəninin tullantılarından yaranan göl salınıb. Onlar bundan sonra bağlarında meyvə qalmadığını, arı təsərrüfatlarının dağıldığını deyiblər.
İyulun 11-də Prezident İlham Əliyev hökumətin müşavirəsində Söyüdlüdəki etirazlardan danışarkən polisin davranışını müdafiə edib, kimsənin polisə ləkə vurmasına imkan verməyəcəyini deyib. O, vətəndaşların qanuna tabe olmalı olduğunu vurğulayıb. Prezident Ekologiya və Təbii Sərvətlər Nazirliyinin ətraf mühitlə bağlı məsələdə səhlənkarlıq etdiyini deyib.
Ötən il iyulun 14-də Azərbaycanın Baş naziri Əli Əsədovun qərarı ilə şirkətin Söyüdlü qızıl mədənində fəaliyyəti müvəqqəti olaraq dayandırılıb və "Anglo Asian Mining"in fəaliyyətinin ətraf mühitə təsirinin monitorinqi aparılıb.
"Anglo Asian Mining" şirkəti 21 avqust 1997-ci ildə imzalanmış hasilatın pay bölgüsü çərçivəsində Azərbaycanda qızıl hasilatını həyata keçirir. Müqavilə üzrə Azərbaycanın payı 51 faiz, Britaniya şirkətinin payı 49 faiz təşkil edir.
Forum