Əta Kərimi, Qulam Quluzadə, Sina Həsəni və Əli Əzizi adlı dörd türk fəal, Urmiyə İnqilab Məhkəməsinin qərarı ilə hər biri iki il müddətinə azadlıqdan məhrum ediliblər.
HRA xəbər agentliyinin məlumatına görə, bu fəallar Urmiyə İnqilab Məhkəməsinin 3 saylı şöbəsinin qərarına əsasən, "ölkənin təhlükəsizliyini pozmaq məqsədi ilə bir qruplaşmaya üzv olmaq" ittihamı ilə təqsirkar biliniblər.
Bu azərbaycanlı fəallar 2015-ci il iyunun 6-da Urmiyə gölünün qurumasına etiraz edərkən təhlükəsizlik qüvvələri tərəfindən həbs edilmişdilər. Onlar Ümumdünya Ətraf Mühit Günündə İran hökumətinin Urmiyə gölünü xilas etmək üçün lazımi tədbirlər görmədiyini və ya gölün qəsdən qurudulduğunu ifadə etdikləri üçün təhlükəsizlik qüvvələri tərəfindən saxlanılmışdılar.
Onların həbsindən 9 ildən çox vaxt keçməsinə baxmayaraq, Urmiyə İnqilab Məhkəməsi onlara qarşı həbs hökmü çıxarıb. Bundan əvvəl məhkəmə bu fəallara qarşı ittihamları iki dəfə dayandırmışdı, lakin Urmiyə İnqilab Məhkəməsinin prokuror müavininin etirazları nəticəsində iş yenidən açılıb.
Qulam Quluzadə, Əli Əzizi və Sina Həsəni son illərdə fəaliyyətlərinə görə dəfələrlə məhkəmə qarşısına çıxarılıb və məhkum olunublar.
Forum