İranın ali dini rəhbəri bazar günü Məsud Pezeşkianı rəsmi olaraq prezident kimi təsdiqləyərək, islahatçı siyasətçi və ürək cərrahının nüvə proqramı ilə bağlı iqtisadi sanksiyalarla zəifləmiş ölkəyə rəhbərlik etməsinə icazə verib.
Ayətullah Əli Xameneyi mərasim zamanı Pezeşkianı qonşuları, Afrika və Asiya ölkələrini və Tehranın xarici əlaqələr siyasətində İranı “dəstəkləyən və yardım edən” ölkələri prioritetləşdirməyə çağırıb.
Xameneyi Avropa ölkələrini sanksiyalar, neft embarqosu tətbiq etməklə və iddia edilən insan haqları pozuntularını dilə gətirərək, “bizimlə pis rəftar etdiklərinə” görə tənqid edib.
O həmçinin İsraili Qəzzada İsrail əsgərlərinə “bir güllə belə atmayan” uşaqların, qadınların və xəstəxanaya yerləşdirilən insanların ölümü ilə nəticələnən hərəkətlərinə görə qınayıb.
Xameneyi İsraili “sui-qəsdlərdə yeni rekord” və qəddarlıqda ittiham edərək, “sionist rejim müharibə cinayətkarı kimi ən eybəcər üzünü göstərir” deyib. O həmçinin ABŞ Konqresini İsrailin baş naziri Benyamin Netanyahunun qanunverici orqanda çıxışına icazə verdiyinə görə qınayıb.
Eyni mərasimdə çıxış edən Pezeşkian 2020-ci ildə ABŞ-ın pilotsuz təyyarəsinin hücumu nəticəsində öldürülən İranın regional hərbi fəaliyyətlərinin memarı olan general Qasım Süleymanini yad edib.
O, “konstruktiv və səmərəli” xarici siyasət yürütmək, qanunun aliliyini gücləndirmək, vətəndaşlara bərabər imkanlar təklif etmək, ailələrə dəstək olmaq və ətraf mühiti qorumaq vədini təkrarlayıb.
Pezeşkian vəzifəsində ilk rəsmi fəaliyyəti olaraq 72 yaşlı Məhəmməd Rza Arefi birinci vitse-prezident təyin edib. Mötədil islahatçı hesab edilən Aref 2001-2005-ci illər arasında keçmiş prezident Məhəmməd Hatəminin dövründə bu postu tutub. Aref Stanford Universitetində mühəndislik üzrə doktorluq dərəcəsi alıb.
Pezeşkian sələfi İbrahim Rəisinin may ayında helikopter qəzasında həlak olmasından sonra keçirilən növbədənkənar seçkilərdə qalib gəlib. O, çərşənbə axşamı parlamentdə and içəcək. Onun parlamentdə etimad səsverməsinə qədər öz kabinetini formalaşdırmaq üçün iki həftə vaxtı olacaq.
İranın yeni prezidenti seçki kampaniyasında İranın şiə teokratiyasında köklü dəyişiklik etməyəcəyinə söz verərək, Xameneyini bütün dövlət məsələlərində son sözü deyən arbitr kimi qəbul edib. Pezeşkian İranın xarici siyasətini Qərblə ya qarşıdurmaya, ya da əməkdaşlığa yönəldə bilər. O, hökumətdə hələ də ipləri əlində tutan sərt xətt tərəfdarlarının daimi çağırışları ilə üzləşə bilər.
Forum