İsrailin baş naziri Benyamin Netanyahunun çərşənbə günü ABŞ Konqresinə müraciəti zamanı İsrailin HƏMAS-a qarşı müharibəsinə dəstəyi artırmağa çalışacağı gözlənilir.
Netanyahunun səfəri HƏMAS-ın Qəzza zolağında hələ də saxladığı girovların azad edilməsi üçün ölkəsindəki təzyiqlər, habelə İsrailin əsas müttəfiqi - ABŞ üçün noyabrda keçiriləcək prezident seçkiləri öncəsi siyasi qeyri-müəyyənlik fonunda baş verir.
Birləşmiş Ştatlar, Misir və Qətər İsrail və HƏMAS arasında döyüşlərin dayandırılmasını, girovların azad edilməsini və Qəzzaya humanitar yardımın artırılmasını əhatə edən atəşkəs əldə etmək üçün aylar sərf edib.
Qəzzada döyüşlər, İsrail-Livan sərhədində toqquşmalar və Yəmənin husi militantlarının Qırmızı dənizdə gəmilərə hücumu ilə daha geniş regional münaqişə təhlükəsi davam edərkən bu səylər nəticəsiz qalıb.
Netanyahu bildirib ki, o, İsrailə ikitərəfli dəstək əldə etməyə çalışacaq. Onun Vaşinqtonda çıxışı Demokratlar və Respublikaçılar arasında parçalanma yarada bilər. Bir sıra Demokratlar Netanyahunun müraciətini boykot edəcəklərini deyib.
Netanyahunun ABŞ Konqresində çıxışı saynca dördüncü olacaq və bu, digər dünya liderlərindən daha çoxdur. Onun çıxışı zamanı ifrat sağçı iqtidar tərəfdaşları onun müharibəni davam etdirmək və HƏMAS-ı devirmək qərarını eşitmək istəyəcəklər.
Netanyahunu danışmağa dəvət edən Nümayəndələr Palatasının spikeri Mayk Conson vitse-prezident Kamala Harrisin iştirak etməməsini tənqid edərək, bunu “üzrsüz” adlandırıb.
Harris prezident Co Baydenin yenidən seçilmək istəməyəcəyini elan etməsindən bir neçə gün sonra təşviqat tədbiri üçün səyahətdədir.
Netanyahunun seçkiqabağı müraciətində keçmiş prezident Donald Trampın namizədi Respublikaçı senator J.D.Vans da iştirak etməyəcək.
Demokrat senator Berni Sanders də çıxışda iştirak etməyəcəyini bildirib. O,Netanyahunun İordan çayının qərb sahili və Qəzzadakı siyasətini tənqid edib.
Demokrat senator Dik Durban deyib ki, o, İsrailin yanında olsa da, “Mən onun hazırkı baş nazirini dəstəkləməyəcəyəm”.
Tənqidçilər Netanyahu hökumətini Qəzzadakı müharibəyə görə günahlandırır. Onlar İsrailin fələstinli mülki əhalini qorumaq və ya humanitar yardım axınını təmin etmək üçün kifayət qədər iş görmədiyini iddia edir.
Netanyahunun səfəri etiraz aksiyaları ilə müşayiət edilir.
Forum