İyunun 22-də 1 saylı Bakı İstintaq Təcridxanasında saxlanılan “Toplum TV” internet nəşrinin təsisçisi Ələsgər Məmmədlinin qalxanabənzər vəzində aşkar olunan şişdən özəl klinikada (West Hospital) iynə biopsiyası götürülüb. Bu barədə Əlsəgər Məmmədlinin ailəsinə və vəkillərinə qabaqcadan xəbər verilməyib.
Məmmədlinin qardaşı Nəsimi Məmmədli Amerikanın Səsinə bildirib ki, iyunun 22-də biopsiya edildikdən və Ələsgər Məmməldi təcrdixanaya qaytarıldıqdan sonra klinika onun ailəsinə xəbər verib.
“Iyunun 22-də klinikadan mənə zəng etdilər ki, Ələsgər bəyin biopsiyası artıq edilib və bununla bağlı klinikaya ödəniş etməlisiniz. Mən təcili klinikaya gəlsəm də Ələsgər bəy artıq orada yox idi. Biopsiya olunduğunu bildirdilər. Təbii ki, tələb olunan məbləği ödədikdən sonra klinikadan çıxdım”, o qeyd edib.
Nəsimi Məmmədli iyunun 22-də həm də təcridxanada qardaşı ilə görüşüb.
“Ələsgər bəyin boğazının sol hissəsində iynənin çıxarıldığı yerə xüsusi tibbi bant yapışdırılmışdı. Bantın üzərindən quru qan ləkəsi görünürdü. Biopsiyanı edən həkim tövsiyə etmişdi ki, bir müddət sonra bantı çıxara bilər. Amma infeksiya keçməsin deyə tez çıxarmamağı məsləhətdir. Ələsgər bəyin sağ qolunun dirsəkdən biləyə kimi dəri hissəsində 3 xətli nazik sıyrılmış açıq yaralar diqqətimi çəkdi. Dərinin səthi sanki sərt əşyaya sürtülərək açılmışdı. Bənizi solğun, taqətsiz halda, yüksək təzyiqli və kəskin baş ağrısı ilə görüşə gələn Ələsgər bəy bu gün (iyunun 22-də) başına gələnləri mənə özü nəql etdi. Onu səhər təcili 2-3 nəfərlik konvoy nəzarəti altında West Hospitala gətiriblər. Təcridxanadan klinikaya gətirilməsini heç kimə deməyiblər. Tamamilə gizli şəkildə gətirilib. Klinikanın arxa qapısından içəriyə daxil olanda orada təqribən 30 nəfərlik mülki və polis geyimdə təhlükəsizlik orqanlarının əməkdaşları olub. Polisin və mülki geyimli təhlükəsizlik orqanı əməkdaşlarının əhatəsində, qolları qandallı şəkildə onu klinakanın 4-cü mərtəbəsində yerləşən əməliyyatxanaya qaldırıblar. Liftin girişində və çıxışında 10-15 nəfərlik xüsusi mühafizə yerləşdirilib. Biopsiya ediləcək kiçik palataya qolu qandallı daxil olub. Məhkəmə qərarında adları qeyd edilən həkimlər Azər Hümbətov və Aydın Əliyevin iştirakını tələb edib, amma təhlükəsizlik orqanının mülki geyimli əməkdaşları bu istəyi qəbul etməyib. Azər və Aydın həkim başqa klinikada olduqlarına görə onları çağırmağa icazə verilməyib. Deyiblər ki, cəmi 20-25 dəqiqə vaxtınız var. Biopsiyanı başqa həkim etsin. Klinikadan təkilf edilən başqa bir həkim biopsiya etməli olub. Palataya çağırılan həkimin UZİ altında sərbəst iynə biopsiyası etməsi üçün çox məhdud şərait yaradılıb. Əməliyatxanaya adi geyimdə, ayaqqabıda (baxılsız) daxil olan 10-12 nəfərlik təhlükəsizlik orqanı əməkdaşları Ələsgər bəyin başının üstündə dayanıb. Qapının arxasında da təqribən bu qədər polis geyimində olan şəxs olub. Hətta Ələsgər bəyin əynindəki köynəyini çıxarmasına qollarındakı qandal maneə törətdiyinə görə həkimin israrından sonra qandalın açılmasına icazə veriblər. Ələsgər bəyin belə bir mühafizə altında klinikaya gətirilməsini təhlükəsizlik tədbiri ilə əlaqələndiriblər”, o qeyd edib.
Nəsimi Məmmədlinin sözlərinə görə, qardaşının həkimləri tövsiyə etmişdilər ki, biopsiya ilə yanaşı digər zəruri analizlər də mütləq verilməlidir.
“Bununla əlaqəli ayrıca rəsmi tibbi tövsiyələrin qeyd olunduğu sənəd də verilmişdi. Tiroid Biopsiyası ilə yanaşı, TSH, ST4, Tireoglobulin, bilirubin fraksiyaları, GGT, ALT, AST, Amilaza, şəkər HbAıC, Kreatin, Qanın ümumi analizi. Təhlükəsizlik qüvvələri bu analizlərin verilməsinə də imkan verməyiblər".
O bildirib ki, ciddi bir problem isə boğazdakı bir neçə şişin ən böyüyündən biopsiya götürülməməsidir.
“Sağ payda aşkar olunan 23 millimetrlik şişdən deyil, 12-14 millimetrlik sol paydakı düyündən götürülüb. Biopsiya əməliyatını həkim çox məhdud şəraitdə icra edib. Həkimin xahişinə baxmayaraq, təhlükəsizlik əməkdaşları bir addım belə geri çəkilməyiblər. Ələsgər bəy deyir ki, həkim əl-qolunu güclə tərpədirdi. Həkim işini tamamilə əhatəyə alınmış halda icra edib. Qollarındakı sıyırıqlar isə biopsiyadan çıxıb maşına mindirilərkən ani başgicəllənməsinə görə müvazinətini itirib, qolları qandallı olduğuna görə heç yerdən tuta bilməyib və maşının qapısındakı hansısa çıxıntıya sürtülüb”, o qeyd edib.
Məmmədli qardaşının sağlamlığına yaranmış real təhlükəni ortadan qaldıraq üçün vəsatət verildiyini xatırladıb.
“Amma belə anladıq ki, buna nail olmağa imkan vermək istəməyənlər var. Ələsgər bəy özü də anlamağa çətinlik çəkir ki, niyə belə bir pis rəftara məruz qalıb. Onun həyatına qəsd etməkdən kim, nə qazanacaq? Qısa müddət içərisində məhkəmə qərarı bax belə icra olunub. Ələsgər bəydən biopsiya ilə götürülən analizin cavabı 10 gün ərzində bilinəcək. İndi nə biz, nə də toplumun vicdanlı hissəsi bu çıxacaq analizin nəticəsinə necə güvənsin, etibar etsin? Məhkəmənin qərarını belə icra edəcəkdinizsə, buna heç öncədən icazə verməyəydiniz”, o qeyd edib.
Xatırladaq ki, iyunun 15-də Xətai Rayon Məhkəməsi hakim Aygün Həsənovanın sədrliyi ilə keçən qapalı iclasda Ələsgər Məmmədlinin qalxanabənzər vəzində aşkar olunan 23 millimetrlik şişdən özəl klinikada (West Hospital) iynə biopsiyası götürülməsi barədə qərar verib.
Martın 6-8-də Tolum TV və onun tərəfdaş təşkilatı Demokratik Təşəbbüslər İnstitutunun 9 əməkdaşı saxlanılıb. Onlar xarici valyuta qaçaqmalçılığında ittiham olunurlar. Yeddi nəfər barədə həbs qətimkan tədbiri seçilib, iki nəfər isə polisin nəzarətinə verilib.
Toplum TV-nin təsisçisi Ələsgər Məmmədli də valyuta qaçaqmalçılığında ittiham olunur.
Biopsiya şübhəli törəmənin mikroskop altında oxunmasıdır. Yəni iynə vasitəsilə qalxanabənzər vəzdən və yaxud vəzdə olan düyündən bir parça toxuma ya da maye götürülərək mikroskop altında baxılır.
Bu müayinə USM (ultrasəslə müalicə, USM daxili orqanların real görüntülərini göstərə bilir) altında aparılır. İlk öncə kütlə ətrafı tam anastetiklərlə blokada olunur, sonra kiçik dəri üzərində kəsim aparmaqla iynə USM altından patoloji düyünə yeridilir. Kütlədən bir neçə toxuma nümunəsi götürülür.
Forum