MSK: İlham Əliyev 92,12 faiz səs toplayıb
Mərkəzi Seçki Komissiyası 6537 seçki məntəqəsinin hamısından bülletenleri 100 faiz nəzərdən keçirdikdən sonra növbədənkənar prezident seçkilərinin nəticələrini açıqlayıb.
MSK-nin məlumatına görə, hazırkı prezident İlham Əliyev 92,12 faiz səs (4 577 693 səs) toplayaraq birincidir.
Zahid Oruc 2,17 faiz (107 877 səs), Fazil Mustafa 1,98 faiz (98 623 səs), Qüdrət Həsənquliyev 1,72 faiz (85 607 səs), Razi Nurullayev 0,80 faiz (39 727 səs), Elşad Musayev 0,66 faiz (32 956 səs), Fuad Əliyev 0,53 faiz (26 561 səs) səs toplayıb.
Seçkilərin nəticələri yoxlanmaq və təsdiqlənmək üçün Konstitusiya Məhkəməsinə göndəriləcək. Konstitusiya Məhkəməsinin qərarından sonra dövlət başçısının andiçmə mərasimi keçiriləcək.
Maraqlıdır ki, yuxarıdakı siyahıdakı son üç namizədin heç biri namizədlikləri qeydə alınmaq üçün MSK-ya təqdim etdikləri 40 min seçici imzası qədər səs toplaya bilməyib.
Yerli medianın məlumatına görə, prezidentiyə namizədlərin hamısı İlham Əliyevə zəng edərək onu seçkidə qələbə qazanması münasibəti ilə təbrik edib.
ATƏT-in Demokratik Təsisatlar və İnsan Hüquqları Bürosunun (DTİHB) Seçki Müşahidə Missiyasının (SMM) Azərbaycanda keçirilən növbədənkənar prezident seçkisi ilə bağlı ilkin müşahidələrində deyilir ki, fevralın 7-də növbədənkənar prezident seçkiləri məhdudlaşdırıcı mühitdə keçib.
“Seçkiyə hazırlıqlar səmərəli idarə edilsə də, tənqidi səslərin boğulması və siyasi alternativlərin olmaması ilə yadda qalıb”, sənəddə qeyd edilir.