Azərbaycanda növbədənkənar prezident seçkiləri

İlham Əliyevin beşinci dönəm hakimiyyətdə qalmasını təmin edən seçkilər siyasi rəqabət çatışmazlığı və kütləvi məhdudiyyətlərlə müşayiət olunub, deyə Qərbli seçki müşahidəçiləri bildirib.

Çərşənbə günü səslərin 92 faizini qazandığı deyilən İlham Əliyevin qələbəsi müstəqil mediaya və müxalifət basqılar fonunda baş verib.

ATƏT-in Demokratik Təsisatlar və İnsan Hüquqları Bürosunun (DTİHB) Seçki Müşahidə Missiyası (SMM) səsvermənin qeyri-rəqabətcil mühitdə keçirildiyini vurğulayıb.

“Altı digər namizəd kampaniyada iştirak etsə də, onlardan heç biri hakimiyyətdə olan prezidentin siyasətinə inamlı maneə yaratmadıqlarına görə seçicilər həqiqi alternativsiz qalıb,” açıqlamada deyilir.

Mətbuat konfransında açıqlanan sənəddə bildirilir ki, fevralın 7-də növbədənkənar prezident seçkiləri məhdudlaşdırıcı mühitdə keçdi, seçkiyə hazırlıqlar səmərəli idarə edilsə də, tənqidi səslərin boğulması və siyasi alternativlərin olmaması ilə yadda qaldı.

"Bu, Azərbaycan Respublikasının bütün beynəlxalq səviyyədə tanınmış ərazisində keçirilən ilk seçki idi. Bu mövzu əsasən süst keçən kampaniyada üstünlük təşkil edib və ictimai əhval-ruhiyyəni əks etdirib," açıqlamada vurğulanıb.

Sənəd müəllifləri hesab edirlər ki, hazırkı prezidentin mövqeyi mənalı mübahisələndirilməyib, müstəqil media, vətəndaş cəmiyyəti və siyasi partiyalar üçün məkanın daralması ilə bərabər, ölkə rəhbərinin səlahiyyətlərin artırılması isə həqiqi plüralizmdən məhrum olan rəqabətlə nəticələnib:

"Birləşmək, ifadə və sərbəst toplaşmaq kimi fundamental azadlıqlara uzun müddətdir qoyulmuş ciddi məhdudiyyətlər həm qanunda, həm də təcrübədə həqiqi demokratik seçkilər üçün standartlara ziddir."

Sənəddə qeyd edilir ki, seçki komissiyaları kifayət qədər resurslarla təmin olunsa da, səsvermə, səslərin hesablanması zamanı səhvlərin edilməməsi üçün mühüm təminatlara çox vaxt məhəl qoyulmayıb.

Azərbaycanın Mərkəzi Seçki Komissiyası (MSK) növbədənkənar prezident seçkilərində seçki məntəqələrindən alınmış ilkin məlumatları açıqlayıb. MSK-nın məlumatına görə, seçkilər Azərbaycanın bütün 125 məntəsində baş tutub. Seçki məntəqələrinin 54.47 faizindən əldə edilmiş məlumata əsasən, hazırkı prezident İlham Əliyev 92.1 səs toplayaraq, böyük səs çoxluğu ilə irəlidə gedir.

MSK-nın məlumatına əsasən, səslər digər namizədlər arasında aşağıdakı kimi bölünüb:

Zahid Oruc - 2.2 faiz

Fazil Mustafa - 1.99 faiz

Qüdrət Həsənquliyev - 1.78 faiz

Razi Nurullayev - 0.79 faiz

Elşad Musayev - 0.66 faiz

Fuad Əliyev - 0.48 faiz

Mərkəzi Seçki Komissiyası bugünkü seçkilərdə respublika üzrə 4 milyon 971 min 32 nəfərin səs verdiyi, seçici fəallığının 76,73 faiz olduğu haqda məlumat verib.

"Müsavat Partiyası 2024-cü il 7 fevral tarixində keçirilən növbədənkənar prezidenti seçkilərinin nəticələrinin ləğv edilməsini, Azərbaycan xalqının azad iradəsini əks etdirən və beynəlxalq standartlara cavab verən, demokratik seçkilər vasitəsilə prezident seçkilərinin keçirilməsini tələb edir. Növbədənkənar prezidenti seçkiləri azad və ədalətli olmayıb", Müsavat Partiyasının növbədənkənar prezident seçkiləri ilə bağlı ilkin rəyində deyilir. Xəbərin davamı burada.

Azərbaycanda keçirilən növbədənkənar prezident seçkilərində səsvermə Bakı vaxtı ilə saat 19-da başa çatıb. Bülletenlərin sayılmasına başlanılıb.

Səsvermə son 30 ildə ilk dəfə Azərbaycanın suverenliyində olan bütün ərazilərdə, 125 seçki dairəsindəki 6 319 seçki məntəqəsi üzrə aparılıb.

Mərkəzi Seçki Komissiyasının (MSK) məlumatına görə, seçkilərdə respublika üzrə 4 milyon 971 min 32 nəfər səs verib. Seçici fəallığı 76,73 faiz olub.

ABŞ-nin “Oracle Advisory Group” təşkilatının Azərbaycanda keçirilən növbədənkənar prezident seçkilərində apardığı “exit-poll”un nəticələrinə görə, hazırki president İlham Əliyev 93,9 faiz seçicinin səsini qazanıb.

Zahid Oruc 1.8, Fazil Mustafa 1.5, Qüdrət Həsənquliyev 1.2, Razi Nurullayev 0.9, Elşad Musayev 0.4, Fuad Əliyev 0.3 faiz səs yığıb.

Bu, Azərbaycanda prezidentlik uğrunda keçirilən 9-cu rəsmi ümummilli seçkidir. Prezident seçilən şəxsin səlahiyyət müddəti 7 il olacaq.

Seçkilərdə yeddi namizəd iştirak edib. Bunlar hakim Yeni Azərbaycan Partiyasının prezidentliyə namizədi İlham Əliyev, namizədliyi özü tərəfindən irəli sürülən Zahid Oruc, Milli Cəbhə Partiyasının prezidentliyə namizədi Razi Nurullayev, Böyük Quruluş Partiyasının prezidentliyə namizədi Fazil Mustafa, Böyük Azərbaycan Partiyasının prezidentliyə namizədi Elşad Musayev, Bütöv Azərbaycan Xalq Cəbhəsi Partiyasının prezidentliyə namizədi Qüdrət Həsənquliyev və namizədliyi özü tərəfindən irəli sürülən Fuad Əliyevdir.