Müdafiəçi Hüquq Mərkəzi "Abzas Media"ya qarşı təqibləri dayandırmağa çağırır

Müdafiəçi Hüquq Mərkəzi "Abzas Media"nın direktoru Ülvi Həsənlinin, baş redaktoru Sevinc Vaqifqızının və ictimai fəal Məhəmməd Kekalovun həbs olunması, həmçinin "Abzas Media" xəbər portalının ofisində axtarış aparılması barədə bəyanat yayıb.

Müdafiəçi Hüquq Mərkəzi müvafiq polis orqanları tərəfindən Ülvi Həsənlinin, Sevinc Vaqifqızının və Məhəmməd Kekalovun həbs olunmasını və "Abzas Media"nın ofisində axtarış aparılmasını Azərbaycanda ifadə azadlığı hüququna, o cümlədən müstəqil mediaya qarşı siyasi motivli təqib kampaniyasının tərkib hissəsi kimi qiymətləndirir.

Müdafiəçi hesab edir ki, Azərbaycan hökumətinin təqib siyasəti mövcud konstitusion hüquqi çərçivəyə və Azərbaycan Respublikasının insan hüquqlarına dair götürdüyü beynəlxalq hüquqi öhdəliklərə ziddir, bu səbəbdən də hökumət bu təqibləri dayandırmalıdır.

"Ölkədə siyasi müxalifətə, tənqidçi vətəndaş cəmiyyətinə və müstəqil mediaya qarşı aparılan siyasi motivli təqib kampaniyasına, o cümlədən bu çərçivədə həyata keçirilən cinayət işlərinə və digər hüquqi məhdudiyyət tədbirlərinə dair Avropa İnsan Hüquqları Məhkəməsi tərəfindən Avropa İnsan Hüquqlarının Konvensiyasının qeyri-legitim, siyasi motivli hüquq məhdudiyyətlərini qadağan edən 18-ci maddəsi üzrə Azərbaycana qarşı 11 hüquq pozuntusu qərarı qəbul edilib. Hazırda həmin qərarların icrası Avropa Şurası Nazirlər Komitəsinin nəzarətindədir. Azərbaycan hökumətinin həmin hüquq pozuntusu qərarlarının icrası üzrə həyata keçirməli olduğu ümumi tədbirlərdən biri də siyasi motivli təqib kampaniyalarını təkrarlamamaqdır. Qeyd edilənləri nəzərə alaraq, Müdafiəçi Azərbaycan Hökumətinə çağırış edir ki, Ülvi Həsənli, Sevinc Vaqifqızı, Məhəmməd Kekalov və "Abzas Media"nın timsalında siyasi motivli təqibləri dayandırsın və "Abzas Media" barəsində aktual və potensial cinayət prosessual addımlardan çəkinsin", o bildirib.

Həmçinin Müdafiəçi beynəlxalq publik təşkilatları və beynəlxalq qeyri-hökumət təşkilatlarını Azərbaycanda yenidən canlanmağa başlayan siyasi motivli təqib kampaniyasını ciddi nəzarətə götürməyə dəvət edir.

Məhəmməd Kelalovun noyabrın 20-də evlərindən mülki geyimli polis əməkdaşları tərəfindən zorakılıqla aparıldığı bildirilir. Daxili İşlər Nazirliyinin sözçüsü bildirib ki, Məhəmməd Kekalov Cinayət Məcəlləsinin 206.3.3-ci maddəsi ilə təqsirləndirilən şəxs qismində saxlanılıb.

Noyabrın 21-də Xətai Rayon Məhkəməsi "Abzas Media" xəbər saytının direktoru Ülvi Həsənli barəsində 4 ay, saytın baş redaktoru Sevinc Vaqifqızı barəsində 3 ay 29 gün müddətinə həbs qətimkan tədbiri seçib.

Hər iki jurnalist Cinayət Məcəlləsinin 206.3.2-ci maddəsi (qaçaqmalçılıq-qabaqcadan əlbir olan bir qrup şəxs tərəfindən törədildikdə) ilə ittiham olunur.

Jurnalistlərin vəkilləri Zibeydə Sadıqova və Elçin Sadıqovun sözlərinə görə, onların hər ikisi məhkəmədə ittihamları rədd edib.

Vəkillər məhkəmənin qərarından apellyasiya şikayəti verəcəklərini bildirib.

Vəkillər Elçin Sadıqov deyib ki, Sevinc Vaqifqızı xarici ölkədən noyabrın 21-də Azərbaycana gəlib.

"Mən məhkəmədə Vaqifqızının könüllü olaraq Azərbaycana gəlməsi barədə videonu nümayiş etdirdim. Qeyd etdim ki, ittihamın sübutu yoxdur. Aşkar edilmiş məbləğin mənbəyi, haradan gətirilməsi, yerli banklardan alınması barədə hər hansı sübut yoxdur. Yəni absurd bir fərziyyə ilə ittiham verdilər və məhkəmə də həbs-qətimkan tədbiri seçdi" - deyə, Sadıqov qeyd edib.

Vəkil Zibeydə Sadıqova bildirib ki, Ülvi Həsənli məhkəmədə pulun ona aid olmadğını deyib və müdafiə tərəfi bunu sübut edən arqumentlərini irəli sürüb, lakin məhkəmə bunları nəzərə almayıb.

Noyabrın 20-də Bakı Şəhər Baş Polis İdarəsinin əməkdaşları "Abzas Media"nın ofisində axtarış zamanı 40 min avro müəyyən edərək götürüb. Ülvi Həsənli pul vəsaitinin ona aid olmadığını bildirib. Həsənli və Vaqifqızı ittihamı qəbul etmir və "Abzas Media"da dərc olunan korrupsiya araşdırmaları ilə bağlı olduğunu bildirirlər.