Azərbaycanda dini mahnıların ifaçısı kimi tanınan, “Müsəlman Birliyi” Hərəkatının fəalı Kamran Fərat noyabrın 16-da polis bölməsində bir neçə saat saxlanıldıqdan sonra axşam saatlarında sərbəst buraxılıb.
Bu barədə Amerikanın Səsinə vəkil Zibeydə Sadıqova bildirib.
Vəkil qeyd edib ki, saxlanma müddətində onu müdafiə etdiyi şəxsin yanına buraxmayıblar.
Fəratın özündən və ailə üzvlərindən şərh almaq hələ mümkün olmayıb.
Fərat saxlanıldıqdan sonra onun 8 dəqiqəlik videomüraciəti yayılıb.
Videoda Fərat deyir ki, saxlanılacağını və həbs oluna biləcəyini düşünərək bu müraciəti əvvəlcədən hazırlayıb. O qeyd edir ki, ailə üzvlərindən xahiş edib ki, saxlanıldıqdan sonra bu videonu yaysınlar.
Videoda musiqiçi deyir ki, heç bir cinayət törətməyib və əgər onu həbs edərlərsə, bunun səbəbi onun dini mahnılar ifa etməsidir, o cümlədən “Müsəlman Birliyi” Hərəkatı üçün musiqi bəstələməsidir.
“Fərət aprel ayında bəzi KİV-də onun "İran casusu" olması barədə yayılan fikirlərin yalan olduğunu deyib. Bunların hamısı yalandır. Mənim mahnılarım həqiqət-ədalət haqqındadır. İrana xidmət etdiyim doğru deyil. Mən Azərbaycan vətənpərvəriyəm. Mən şəhid Mübarizə (Azərbaycanın Milli Qəhrəmanı), 2020-ci il 44 günlük müharibədə, aprel döyüşlərində (2016-cı il) həlak olanlara mahnılar həsr etmişəm. Mən dövlətimin əleyhinə mahnı oxumamışam. Mahnılarımın mövzuları Əhli-beytə (islam ənənəsində şiələrin etimad etdiyi Məhəmməd peyğəmbərin ailəsi) həsr olunub”, Fərat videoda qeyd edib.
Forum