Qubad İbadoğlunun qohumları barədə araşdırma aparıldığı bildirilir

Azərbaycan Demokratiya və Rifah Hərəkatının sədri Qubad İbadoğlunun Füzulidə yaşayan qohumlarının araşdırıldığı bildirilir. Bu barədə məlumatı hərəkat sədrinin qardaşı Qalib Toğrul yayıb.

"Hakimiyyət nümayəndələri saxta ittihamlarla həbs olunmuş professor Qubad İbadoğlunun Füzuli rayonunda yaşayan qohumlarını son 4 ayda ikinci dəfə araşdırmağa və bu yolla onları qorxu və vahimə içərisində saxlamağa cəhd edirlər", deyə o bildirib.

Onun sözlərinə görə birinci araşdırma Qubad İbadoğlu həbs olunandan sonrakı bir ay müddətində olub:

"Yenə başlayıblar, qohumlarımıza zəng edib, onları sorğu-suala tuturlar. Bu prosesdə Füzuli Rayon İcra Hakimiyyətinin və Polis Şöbəsinin əməkdaşları xüsusi fəallıqları ilə seçilirlər. Həyasızcasına hətta 60-70 il öncə rəhmətə getmiş 3-cü və 4-cü dərəcəli qohumlarımızın kimliyinin araşdırılmasına cəhd olunur".

Füzuli rayon Polis Şöbəsindən mövqe almaq mümkün olmayıb.

Füzuli Rayon İcra Hakimiyyətindən bu barədə məlumatsız olduqlarını bildiriblər.

İyulun 24-də Nərimanov Rayon Məhkəməsi Qubad İbadoğlu barədə 3 ay 26 gün həbs qətimkan tədbiri seçib. Qubad İbadoğlu hazırda Azərbaycan Cinayət Məcəlləsinin 204.3.1 (satış məqsədi ilə hazırlama, o cümlədən saxta pul və ya xarici valyuta əldə etmə və ya satma - eyni əməllər mütəşəkkil dəstə tərəfindən törədildikdə), 167-3.1 (Dini ekstremist materialları, yəni dini ekstremist fəaliyyəti həyata keçirməyə çağıran və ya belə fəaliyyəti əsaslandıran, yaxud belə fəaliyyətin zəruriliyinə bəraət qazandıran materialları hazırlama, saxlama və ya yayma) maddələri ilə ittiham olunur. İki ittiham üzrə onu 17 ilədək həbs gözləyir.

Azərbaycan Daxili İşlər Nazirliyi Qubad İbadoğlunun Türkiyədə 2016-cı ildə çevriliş cəhdində ittiham olunan, hazırda Amerikada yaşayan Fətullah Gülənin tərəfdarları ilə əlaqədar keçirilən əməliyyat tədbirləri çərçivəsində saxlanıldığını bildirib.

Qubad İbadoğlu ittihamları qəbul etmir və həbsinin siyasi sifariş olduğunu qeyd edir.

Bir sıra ölkə və beynəlxalq təşkilatlar, o cümlədən ABŞ Dövlət Departamenti, ABŞ senatorları və konqresmenləri İbadoğlunun azad edilməsi üçün çağırışlar edib.