İran prezidenti İbrahim Rəisinin hökuməti hakimiyyətdə ikinci ilini başa vurduğu zaman ölkə mediası onun fəaliyyətini qiymətləndirir və hökumətin nəinki iqtisadi məqsədlərə nail olmadığı, həm də keçmişi xatırladan “reqressiv tədbirlər” gördüyü qənaətinə gəlir.
Tehranda nəşr olunan “Həm-Mihan” qəzeti avqustun 5-də dərc olunan son buraxılışında İslam Respublikası hökumətinin üzərinə götürdüyü “əsas öhdəliklərin əksəriyyətinin yerinə yetirilməməsi”nin təfərrüatlarını açıqlayıb və bu vədlərin çoxunda “əsas göstəricilərdə dönüşlər və mənfi tendensiyaların” açıq-aşkar göründüyünü vurğulayıb.
İranın islahatçı Tikinti İcraçıları Partiyasını dəstəkləyən qəzet hökumətin fəaliyyətini prezidentin və digər rəsmilərin verdiyi şüar və vədlərlə müqayisə edib. Onlar ölkənin rəsmi statistikasına istinad edərək, Rəisi hökumətinin nəzarətindən kənarda vəd edilmiş öhdəliklərin yerinə yetirilməsinə mane ola biləcək gözlənilməz xarici hadisələrin olmadığını vurğulayıblar.
“Həm-Mihan” qəzeti məqaləsində ölkədə müxtəlif sahələrdə, xüsusən də “inflyasiya, gəlirlər və insanların maaşları” ilə bağlı əvvəlki dövrlərlə müqayisədə əhəmiyyətli bir geriləmə olduğunu bildirib. Bundan əlavə, digər problemlərlə yanaşı, ölkənin “təhsil və tibb müəssisələrində əhəmiyyətli geriləmə” ilə üzləşdiyi qeyd edilib.
2021-ci ilin iyun ayından bəri və prezident seçkiləri kampaniyası zamanı Rəisi və onun hökumətinin yüksək səviyyəli rəsmiləri dəfələrlə İranda “sürətli və inqilabi iqtisadi tərəqqiyə” nail olmaq, “4 milyon mənzil” tikmək, “4 milyon iş yeri” yaratmaq və cəmiyyətdə “yoxsulluğun tamamilə” aradan qaldırılmasına söz veriblər.
Bununla belə, Əli Xamneyinin nümayəndələrinin himayəsi ilə Tehranda nəşr olunan “Cumhuri Eslami” qəzeti şənbə günü Rəisi hökumətinin ritorikasını və hərəkətlərini tənqid edən redaksiya məqaləsində yazıb: “Nə vaxta qədər səhvləri keçmişə aid etmək istəyirsiniz?”
“İki il hakimiyyətdə olduqdan sonra heç bir prezident mövcud vəziyyətə görə “əvvəlki hökuməti” günahlandıra bilməz, xüsusən də hazırkı hökumət digər hərbi və milli qurumlarla tam və 100 faiz koordinasiya və birliyə malik olduğu halda”, məqalədə yazılır.
“Comhuri Eslami” qəzetinin məqaləsində daha sonra deyilir: “Belə şəraitdə bütün məsələləri nəzarətə götürmək və bütün çətinlikləri həll etmək üçün hətta bir il belə kifayət qədər vaxtdır; beləliklə, iki ildən sonra problemlərin davam etməsi üçün heç bir məqbul əsas yoxdur.”
Rəisi və onun yüksək səviyyəli hökumət rəsmiləri 2021-ci ilin iyun ayından bəri “ağır iqtisadi vəziyyətin həlli” üçün bir neçə “iqtisadi paket” təqdim etdikləri vaxt davamlı olaraq “qiymətlərə nəzarət” və “birrəqəmli inflyasiya” vəd ediblər. Lakin bütün bu səylər bir çox malların və kommunal xidmətlərin qiymətlərinin daha da artması ilə nəticələnib.
İslam Respublikasının hazırkı hökumətinin hakimiyyətdə üçüncü ilə qədəm qoyduğu zaman yüksək səviyyəli rəsmilər tərəfindən verilən ilkin və əsas vədlərin yerinə yetirilməsi ilə bağlı heç bir rəsmi statistika açıqlanmayıb.
İran Mərkəzi Bankının sədri Məhəmməd Rza Fərzin bundan əvvəl “son aylarda likvidliyin və inflyasiyanın artım tempinin azaldığını” iddia edərək, inflyasiyanın “30 faiz” səviyyəsinə enəcəyini vəd etmişdi.
Bununla belə, Əl-Zəhra Universitetinin iqtisadiyyat professoru Hüseyn Rağfar Rəisi hökumətinin fəaliyyətini tənqid edərək, deyib ki, “ölkədə yaradılan şərait İran iqtisadiyyatını iflasa doğru sürükləyir”.
Forum