Mayın 22-də Qaradağ Rayon Məhkəməsində Azərbaycan Xalq Cəbhəsi Partiyasının fəalı Zamin Salayevin işi üzrə məhkəmə prosesi başa çatıb.
Prokuror onun 4 il 6 ay müddətinə azadlıqdan məhrum edilməsini istəyib. Hakim Zamin Salayevə 4 il həbs cəzası verib.
İclas zamanı 105 gündür 1 saylı Bakı İstintaq Təcridxanasında aclıq edən Zamin Salayevin vəziyyəti pisləşib və təcili yardım çağırılıb.
Vəkil Fəxrəddin Mehdiyev bildirib ki, Zamin Salayev aclığı davam etdirmək niyyətindədir.
AXCP lideri Əli Kərimli bildirib ki, Zamin Salayev barəsində çıxarılan hökm onun siyasi fəaliyyəti ilə əlaqədardır.
Müdafiə tərəfi hökmü qanunsuz hesab edir və qərardan apellyasiya şikayəti verəcəklər.
