İran xəbər agentlikləri çərşənbə günü Qərbi Azərbaycan vilayətinin Xoy şəhərində baş verən zəlzələ nəticəsində təqribən 150 insanın xəsarət aldığını, habelə ən az 17 kəndə ziyan dəydiyini bildirib.
ABŞ-ın Geoloji Araşdırmalar Mərkəzi günortadan sonra saat 1:38-də baş verən zəlzələnin 5.8 bal, İran agentlikləri isə 5.4 bal gücündə olduğunu yazıb.
Yarı-rəsmi "Fars" agentliyinə istinadən, əlaqədar qurumlar zəlzələdən xəsarət alan insanların sayının 147 nəfər olduğunu açıqlayıb.
Agentliyin xəbərində 17 kənddə təqribən 500 yaşayış vahidinə ziyan dəydiyi bildirilib.
İran agentlikləri zəlzələnin Təbriz də daxil olmaqla, yaxın şəhərlərdə də hiss edildiyini qeyd ediblər.
