Azərbaycan Ordusunun Baş Qərargah rəisi Kərim Vəliyev ABŞ-a səfəri çərçivəsində ABŞ Milli Qvardiya Bürosunun rəhbəri Daniel Hokanson ilə görüşüb.
Müdafiə Nazirliyinin mətbuat xidməti bildirir ki, tərəflər "Ştatla (Oklahoma) Tərəfdaşlıq Proqramı" çərçivəsində hərbi əməkdaşlığın hazırkı vəziyyətini və perspektivlərini, eləcə də qarşılıqlı maraq doğuran digər məsələləri müzakirə edib.
Bundan öncə, noyabrın 29-da Azərbaycan Ordusunun Baş Qərargah rəisi Kərim Vəliyev ABŞ-ın Birləşmiş Qərargahlar Rəisləri Komitəsi rəisinin birinci müavini admiral Kristofer Qreyd ilə görüşüb.
Azərbaycan Müdafiə Nazirliyinin məlumatında deyilir ki, görüşdə Azərbaycan ilə ABŞ arasında hərbi əməkdaşlığın perspektivləri və regional təhlükəsizlik məsələləri müzakirə olunub.
Kərim Vəliyevin başçılıq etdiyi nümayəndə heyəti noyabrın 28-dən ABŞ-da səfərdədir.
Səfər zamanı nümayəndə heyətinin "Ştatla Tərəfdaşlıq Proqramı" çərçivəsində Oklahoma ştatında görüşlərinin keçirilməsi planlaşdırılır. Səfər çərçivəsində Azərbaycan Ordusu ilə Oklahoma Milli Qvardiyası arasında əməkdaşlığın 20 illiyi münasibətilə bir sıra tədbirlər təşkil olunacaq.
