Noyabrın 14-20-də ABŞ-ın Azərbaycandakı səfirliyi Qlobal Sahibkarlıq Həftəsini qeyd edir.
"Pandemiyanın yaratdığı qlobal iqtisadi tənəzzülün ardınca keçirilən builki Qlobal Sahibkarlıq Həftəsi sahibkarlığın pandemiyadan sonrakı inklüziv iqtisadi bərpaya necə töhfə verə biləcəyini düşünmək şansıdır" , məlumatda deyilir.
Səfirliyin açıqlamasına görə, Qlobal Sahibkarlıq Həftəsi dünyanın hər bir ölkəsində və icmasında sahibkarları alqışlamaq və onların gücünü artırmaq üçün böyük bir kampaniyadır.
"Hər ilin noyabr ayında 10 milyon insan onları hərəkətə keçməyə ruhlandıran və uğur qazanmaq üçün lazım olan bilik, təcrübə və əlaqələri təmin edən on minlərlə fəaliyyət, müsabiqə və tədbirlərdə iştirak edir. Amerika Birləşmiş Ştatlarının Azərbaycandakı səfirliyi Azərbaycanda sahibkarlığa dəstəyini davam etdirir" - deyə, sənəddə vurğulanır.
Səfirlik qeyd edir ki, Kommersiya Hüququnun İnkişafı Proqramı və Xüsusi Amerika Biznes Təcrübəsi Təlimi kimi proqramlar vasitəsilə sahibkarlara bizneslərini inkişaf etdirməyə kömək etmək üçün təlim və bacarıqlar verir.
Məlumata görə, Amerika Birləşmiş Ştatlarının Beynəlxalq İnkişaf Agentliyinin (USAİD) Azərbaycandakı Missiyası qadın sahibkarlığının dəstəklənməsi üzrə davamlı səylərinin bir hissəsi olaraq bu ilin noyabr ayında Azərbaycanda ilk dəfə Qadınların Milli Biznes Gündəliyini (WNBA) təqdim edb.
Belə ki, WNBA sənədi dövlət və özəl sektorlar arasında dialoqun gücləndirilməsi yolu ilə qadınların sahibkarlıq fəaliyyəti və məşğulluğu qarşısındakı maneələrin azaldılmasına töhfə verəcək.
ABŞ-nin Azərbaycandakı səfirliyi, həmçinin sərmayəçi və biznes müşaviri Patrik MakQinnisin Qlobal Sahibkarlıq Həftəsi üçün Azərbaycanda səfərdə olduğunu bildirir.
"Cənab MakQinnis təlatümlü dövrlərdə sahibkarlıq və qərar qəbuletmə ilə bağlı təcrübəsini bölüşmək üçün yerli auditoriya ilə əlaqə saxlayacaq. Proqrama ABŞ hökuməti mübadilə proqramının məzunları, startap və inkubatorlarda çalışan gənc sahibkarlar, Azərbaycan Dövlət İqtisad Universitetində tələbə və müəllim heyəti ilə görüş daxildir. Proqram ABŞ Dövlət Departamentinin Natiqlər Proqramı, ABŞ-də təhsil almış Azərbaycan Məzunları Assosiasiyası və Azərbaycan Dövlət İqtisad Universiteti ilə əməkdaşlıq edir" , səfirlik bildirir.
Məlumatda qeyd edilir ki, Patrik MakQinnis qlobal miqyasda erkən və inkişaf mərhələsində olan şirkətlərin sərmayəçisi və məsləhətçisidir. O, həmçinin Dünya Bankının erkən mərhələdə maliyyə və özəl kapital üzrə məsləhətçisidir. MakQinnis 2013-cü ildə Oksford ingilis dili lüğətinə əlavə edilən "itirmək qorxusu" üçün qısaldılmış "FOMO" terminini işlədib. Bundan əlavə, o, hit FOMO Sapiens podkastını yaradıb və aparıcılıq edir və beynəlxalq bestseller "İtirmək qorxusu: Böyük Seçim Dünyasında Praktik Qərar Qəbuletmə" və bir günlük işin sabitliyini yeni biznesə başlamaq həyəcanı ilə necə tarazlaşdırmaq barədə "10% Sahibkar" kitablarının müəllifidir.
