Noyabrın 15-də Müsavat Partiyası İran Səfirliyinin qarşısında etiraz aksiyası keçirməyə cəhd edib. Polis əməkdaşları etirazçıları səfirliyin binasının qarşısına yaxınlaşmağa imkan verməyib.
Aksiya İranda dinc etirazların qarşısını alınmasına, bu ölkədəki etnik azərbaycanlıların milli və mədəni hüquqlarının pozulmasına, habelə son zamanlar İran rejimi tərəfindən Azərbaycan Respublikasının suverenliyinə və milli təhlükəsizliyinə qarşı təhdidlərin artmasına etiraz əlaməti olaraq keçirilib. Polis qüvvələri əvvəlcədən səfirlik binasına gedən bütün yolları bağlayıb.
Saat 15.00 radələrində polis Mirzə Fətəli Axundov bağının yanında fəalları saxlamağa başlayıb. Etirazçılar "Azadlıq, ədalət, milli hökumət!", "Rədd olsun molla rejimi" və s. şüarları səsləndirib.
Təşkilatçıların sözlərinə görə aksiyada 50-yə yaxın etirazçı, o cümlədən Müsavat Partiyasının başqanı Arif Hacılı, partiyanın mətbuat katibi Mustafa Hacıbəyli və digər şəxslər saxlanılıb.
Bakı şəhər İcra Hakimiyyəti Müsavat Partiyasının noyabrın 15-də İran səfirliyi qarşısında aksiya keçirməsini məqsədəuyğun hesab etməyib.
