Avropa İttifaqı Şurasının Prezidenti Şarl Mişel Azərbaycanın 5 erməni hərbçini qarşı tərəfə təhvil verməsini alqışlayır.
Bu barədə Aİ Şurasının Prezidenti Twitter hesabında bildirib.
“Avqustun 31-də Brüsseldə baş tutan müzakirələrdən sonra daha beş erməni saxlanılanın Bakı tərəfindən azad edilməsini alqışlayıram. İlk dəfədir ki, təhvil ikitərəfli qaydada həyata keçirilib - bu həm Azərbaycan, həm də Ermənistan üçün etibar deməkdir. Bütün həll edilməmiş humanitar məsələlərin həlli əsas prioritetdir,” Şarl Mişel vurğulayıb.
Bundan əlavə, Aİ-nın Cənubi Qafqaz və Gürcüstan böhranı üzrə xüsusi nümayəndəsi Toivo Klaar da Azərbaycan tərəfinin 5 erməni hərbçinin Ermənistana təhvil verilməsini alqışlayıb.
“Liderlərin avqustun 31-də Brüsseldəki görüşündən sonra Azərbaycan tərəfindən saxlanılan beş erməni hərbçisinin azad edilməsi ilə bağlı xəbərini alqışlayırıq.Bu, əhəmiyyətli humanitar jestdir və eyni zamanda təhvil-təslim prosesinin vasitəçilər olmadan baş tutması diqqətəlayiqdir,” Klaar twitterdə bildirib.
Avropa İttifaqı Şurasının Prezidenti Şarl Mişelin təşəbbüsü ilə 31 avqust 2022-ci il tarixdə Brüsseldə Azərbaycan Respublikasının Prezidenti İlham Əliyevlə Ermənistanın baş naziri Nikol Paşinyan arasında keçirilən görüşdə aparılmış müzakirələrin nəticəsində əldə edilmiş ikitərəfli razılaşmaya əsasən, Azərbaycan sentyabrın 8-də 5 nəfər Ermənistan hərbçisini azad edib və Azərbaycan-Ermənistan dövlət sərhədində qarşı tərəfə təhvil verib.
