ABŞ-ın Azərbaycandakı səfirliyi Bakıda şəhərində olan Landmark Biznes Kompleksi ilə əməkdaşlıq edərək binanın damında bir sıra günəş panelləri quraşdırıb.
Bu barədə ABŞ-ın Azərbaycandakı səfirliyinin məlumatında deyilir.
Məlumata görə, iyulun 5 –dən etibarən Azərbaycanda Landmarkdakı ofis əsasən günəş enerjisi ilə təchiz olunur:
"Biz 2022-ci ilin avqustunda səfirliyin əsas binasında da günəş panelləri quraşdırdıq. Bu günəş panellərinin binanın enerji ehtiyacının 20 faizindən çoxunu ödəyəcəyi təxmin edilir”
Məlumata görə, Landmark binasında günəş panelləri iyun ayında quraşdırılıb və iyulun əvvəlində qoşulub. Ümumilikdə bu panellər səfirlik tərəfindən karbon dioksid emissiyalarını ildə təxminən 195 ton azaldacaq:
“Bu, ildə 275 min kilovat-saatdan çox elektrik enerjisinə qənaət deməkdir. Günəş enerjisi ilə istehsal olunan elektrik enerjisi iqlim dəyişikliyinə səbəb olan hidrokarbon yanacaqların yandırılması nəticəsində istehsal olunan elektrik enerjisindən asılılığımızı azaltmaq üçün də çox vacibdir»
ABŞ-ın Müvəqqəti işlər vəkili Hüqo Gevara deyib:
“Bu günəş panellərinin quraşdırılması səfirliyin ekoloji davamlılıq layihələri silsiləsində ən yeni təşəbbüsdür. Biz fevral ayında qarajımıza elektrikli avtomobil əlavə etdik və aprel ayında havanın keyfiyyətinin monitorinqi proqramına başladıq. Bu təşəbbüslər birlikdə təbiətin mühafizəsi, çirklənmənin azaldılması və iqlim dəyişikliyinin azaldılmasına dəstək verir”.
Landmarkın İdarəedici direktoru Eran Müdüroğlu isə qeyd edib:
“Landmark davamlı enerji sahəsində lider olmaq üçün ABŞ səfirliyi ilə əməkdaşlıq etməkdən qürur duyur”.
Səfirlik xatırladır ki, günəş panelləri Bayden Administrasiyasının 2030-cu ilə qədər ABŞ-də istixana qazı emissiyalarını ən azı 50 faiz azaltmaq məqsədinə töhfə verəcək. Elektrik evləri, biznesləri və sənayeni gücləndirən müasir həyatın vacib hissəsidir. Xəstəxanalar, məktəblər, ictimai nəqliyyat sistemləri və müdafiə sənayesi bazası da daxil olmaqla iqtisadiyyatın əsas sektorlarının fəaliyyəti üçün çox vacibdir:
“Günəş enerjisi ABŞ-də elektrik istehsalının ən sürətlə böyüyən yeni mənbələrindən biridir. Günəş enerjisinin 2022 və 2023-cü illərdə yeni elektrik sektoru imkanlarının yarısından çoxunu təşkil edəcəyi gözlənilir. Biz Azərbaycanda da bu dəyişikliyin bir hissəsi olmaqdan qürur duyuruq".
