Xaçmaz rayonunun Müzəffəroba kəndi (Bakıdan 168 kilometr şimal) yaxınlığında meşə ərazisində güclü yanğın başlayıb.
Fövqəladə Hallar Nazirliyinin (FHN) məlumatına görə, rayon ərazisində havanın küləkli olması səbəbindən yanğının sahəsi genişlənib.
Yanğınsöndürmə işlərini sürətləndirmək və yanğının daha geniş əraziyə yayılmasının qarşısını almaq məqsədi ilə Fövqəladə Hallar Nazirliyinin Mülki müdafiə qoşunları, Xüsusi Riskli Xilasetmə Xidməti və Şimal Regional Mərkəzinin şəxsi heyəti, Ekologiya və Təbii Sərvətlər Nazirliyinin Meşə Təsərrüfatı Mərkəzinin əməkdaşları və Xaçmaz Rayon İcra Hakimiyyətinin müvafiq texnikası əraziyə cəlb olunub. Hal-hazırda yanğınsöndürmə işləri davam etdirilir.
Yerli medianın məlumatına görə, yanğın ərazisinin genişlənməsi səbəbindən Xaçmaz-Xudat avtomobil yolu bağlanıb.
Məlumata görə, hazırda Gəndob-Yalama yolu istiqamətindən keçən hissədə müvəqqəti postlar qurulub, nəqliyyat vasitələri alternativ yollara yönləndirilir.
Ərazidəki istirahət mərkəzinin və yanacaqdoldurma məntəqəsinin əməkdaşları təxliyə olunub.
