Dekabrın 14-də Brüsseldə Azərbaycan Prezidenti İlham Əliyev, Avropa İttifaqı (Aİ) Şurasının Prezidenti Şarl Mişel və Ermənistan Baş Naziri Nikol Paşinyan arasında birgə görüş keçirilib.
Rəsmi məlumatlara görə, konstruktiv mühitdə keçən görüşdə bir sıra önəmli məsələlər müzakirə olunub.
Görüşün nəticələri ilə bağlı Avropa İttifaqı Komissiyasının Prezidenti Şarl Mişel bəyanatla çıxış edib.
Bəyanatda deyilir ki, Prezident Mişel Aİ-nin hər iki liderini hərtərəfli sülh sazişi ilə əsaslandırılmış regionda davamlı sülhün bərqərar olması məqsədilə münaqişənin aradan qaldırılması, əməkdaşlıq və etimad mühitinin yaradılması istiqamətində Ermənistan və Azərbaycanla yaxından işləmək öhdəliyinə inandırıb. Hər üç liderin ümumi məqsədi regionda yaşayan bütün insanların mənafeyi naminə təhlükəsiz, sabit və firavan Cənubi Qafqaz qurmaqdır.
“Baş nazir Paşinyan və Prezident Əliyev 9 noyabr 2020-ci il və 11 yanvar 2021-ci il tarixli iki üçtərəfli bəyanatlar çərçivəsində götürülmüş əsas öhdəliklərə əməl ediləcəyini və 26 noyabr 2021-ci ildə Soçidə əldə edilmiş anlaşmaların əsas götürülməli olduğunu təsdiqləyiblər. Prezident Mişel Ermənistan və Azərbaycan sərhədində son silahlı toqquşmalardan sonra gərginliyin azaldılmasını təmin etmək üçün hər iki liderin atdığı addımları yüksək qiymətləndirib. Xüsusilə, Prezident Mişelin köməkliyi ilə hər iki ölkənin müdafiə nazirləri arasında birbaşa rabitə əlaqəsinin uğurla qurulması etiraf edilib. Bu mexanizm gələcəkdə baş verə biləcək insidentlərin qarşısını almağa və yerlərdə gərginliyin azaldılmasına kömək etməklə müsbət təsir göstərə bilər.”
Prezident Mişel əsas humanitar məsələlərin həllinin həlledici əhəmiyyət daşıdığını vurğulayıb. O, Azərbaycan tərəfindən bu yaxınlarda on erməni məhbusun azad edilməsini və bütün qalan mina xəritələrinin Ermənistan tərəfindən təhvil verilməsini alqışlayıb. O, hər iki tərəfin humanitar jestlərinin etimadı təşviq etdiyini və sülhə doğru irəliləyiş üçün əlverişli mühitin yaradılmasına kömək etdiyini etiraf etməklə yanaşı, digər məhbusların azad edilməsi və itkin düşmüş şəxslərin taleyinin həlli kimi bütün humanitar problemlərin tam və tez həllinə və barışığa çağırıb. Aİ humanitar minatəmizləmə səylərini dəstəkləməyə davam edəcək, o cümlədən ekspert məsləhəti və münaqişədən təsirlənmiş əhaliyə yardım, reabilitasiya və rekonstruksiya işlərini davam etdirəcək. Aİ həmçinin Ermənistan və Azərbaycan arasında etimadın möhkəmləndirilməsi tədbirlərini dəstəkləməkdə davam edəcək.
“Liderlər Aİ ilə hər iki ölkə arasında mövcud və perspektiv əsas ticarət-iqtisadi tərəfdaşlıqları müzakirə ediblər. Onlar həmçinin Aİ-nin regionda etimad yaratmaq, dinc yanaşı yaşamağa töhfə vermək və iqtisadi əməkdaşlığı qurmaq üçün iqtisadi məsləhət platforması yaratmaq niyyətini müzakirə ediblər.”
Şarl Mişel bildirib ki, Prezident Əliyev və Baş Nazir Paşinyan razılaşıblar ki, Ermənistanla Azərbaycan arasında dövlət sərhədinin delimitasiyası və demarkasiyası üzrə planlaşdırılan danışıqlara başlanılması kontekstində əlverişli atmosferi təmin etmək üçün yerlərdə gərginliyin azaldılması üçün əlavə ciddi addımlar atılmalıdır.
Prezident Mişel həm Yerevanı, həm də Bakını fəal şəkildə xoş niyyətlə məşğul olmağa və gərginliyin azaldılması istiqamətində işləməyə çağırıb. O vurğulayıb ki, qüvvələrin müvafiq məsafədə saxlanmasının təmin edilməsi insidentlərin qarşısının alınmasının vacib elementidir. Aİ hər iki ölkəyə texniki yardım göstərməklə sərhədlərin delimitasiyası və demarkasiyası məsələlərini dəstəkləmək üçün ekspert-məsləhətçi qrupu təqdim edəcək.
Prezident Mişel, həmçinin bütün ölkələrin suverenliyinə tam hörmətlə yanaşı, Ermənistan və Azərbaycan, xüsusilə də Cənubi Qafqaz ölkələri arasında kommunikasiya infrastrukturunun bərpasının vacibliyini vurğulayıb.
“Qarşılıqlı prinsiplər əsasında sərhəd və gömrük nəzarəti üçün müvafiq tədbirlər görülməklə, dəmir yolu xətlərinin bərpasına davam etmək razılaşdırılıb. Aİ özünün İqtisadi və İnvestisiya Planına uyğun olaraq əlaqələrin inkişafına dəstək verməyə hazırdır. Təklif olunan iqtisadi məsləhət platforması da bu prosesi dəstəkləyə bilər,” o, qeyd edib.
Prezident Mişel bildirib ki, liderlər görüşlərinin nəticələrini izləmək və əlaqələri davam etdirmək barədə razılığa gəliblər.
