Dünyanın bir çox böyük şəhərində sadəcə çinlilərin məskunlaşdığı məhəllə var - “Chinatown”. Nyu-Yorkda isə nə az, nə çox, düz 3 Çin məhəlləsi var. Manhattan şəhərində yerləşən məhəllənin 140 yaşı var. Turistlərin ən çox ziyarət etdiyi bu məhəllədə 150 min insan yaşayır.
Hər il fevral ayında Nyu-Yorkda yaşayan çinlilər təntənəli Yeni il paradı keçirir. Çinlilr yeni ilə musiqi, rəqs, rəngarəng geyimlər və əyləncəylə girməyi sevir. Onlar inanır ki, yeni ilə nə qədər səs-küylə girsən, il o qədər uğurlu olacaq.
Çində Yeni il Ay təqviminə görə hesablanır. Bu bayram hər ailə üçün önəmlidir. Ənənəyə görə bayram 15 gün davam edir. Böyük süfrələr qurulur və əyləncə başlayır. Çin yeni ili həmçinin soyuq qışın bitişi və baharın gəlişini təmsil edir. Bu bayramı Çindən başqa Şimalı və Cənubi Koreyalar, həmçinin Vyetnam xalqı qeyd edir.
Nyu-Yorkda keçirilən Yeni İl paradı çinlilər qədər bütün Nyu-York xalqının, eləcə də turistlərin diqqətini çəkir. Cəmi ay yarım öncə yeni ilə girən insanlar eyni hissləri yenidən yaşayır. Bayram ab-havasına bürünən küçələrdə hər kəs bir-birinə xoş arzularını diləyir.
