Şimali Kaliforniya üzərindən keçən böyük bir fırtına ağır qar və rekord yağıntılarla müşayiət edilib. Bəzi bölgələri sel altında qoyan fırtına Sakit okeanın şimal-qərbində iki nəfərin ölümünə və yüz minlərlə insanın elektrik enerjisinin kəsilməsinə səbəb olub.
Sinoptiklər sel və daşqın riskinin davam edəcəyini bildirib. San Fransisko hava limanında çoxsaylı uçuşlar ləğv edilib.
Vaşinqton ştatında əksəriyyəti Sietldə olmaqla, 223 000-ə yaxın insan elektriksiz qalıb, işçilər elektrik xətləri, düşmüş budaqlar və zibilləri təmizləməyə çalışır.
Eyni zamanda şərq sahilində nadir meşə yanğınları baş verib.
Milli Hava Xidmətinin xəbərdarlığına görə, San Fransiskonun şimalında yerləşən bölgələr üçün sel xəbərdarlığı şənbəyə qədər qüvvədə olacaq, çünki bölgə bu mövsümün ən güclü atmosfer çayından (okean üzərində formalaşan və quruda axan uzun nəmlik çubuğu) təsirlənib.
"Bombalı siklon" adlandırılan bu fenomen çərşənbə axşamı sahil boyunca güclü küləklərə səbəb olub. Bu, yollar, avtomobillər və evlərin üzərinə ağacların düşməsinə və Vaşinqtonun Linnvud və Belvyu şəhərlərində ən azı iki nəfərin ölümünə yol açıb.
Vaşinqtonda icmalar pulsuz internet və cihazların şarj edilməsi üçün istilik mərkəzləri açıb. Bəzi tibbi klinikalar elektrik enerjisinin kəsilməsi səbəbindən bağlanıb.
Cümə günü üçün Cənubi Oreqon və Kaliforniyanın şimal bölgələrində 41 santimetrə qədər yağış proqnozlaşdırılıb.
Santa Rosada son 24 saat ərzində 16.5 santimetr yağış düşüb və bu, 1998-ci ildən bəri ən yağışlı gün olaraq qeydə alınıb.
San Fransiskonun şimalındakı şərab bölgəsində yerləşən Sonoma County Hava Limanına son 48 saat ərzində 28 santimetrdən çox yağış yağıb.
Ukiah Bələdiyyə Hava Limanı çərşənbə günü təxminən 7.6 santimetr, Venado adlandırılan icma isə 48 saat ərzində 32.3 santimetr yağış qeydə alıb.