Məsud Barış: Rokla haqq səsimizi ucaldırıq

Təbrizin “Barış” rok qrupu təkcə İran Azərbaycani deyil, Azərbaycan, Türkiyə və Mərkəzi Asiya ölkələrində populyarlıq qazanıb. Qrup keçən il Kazan şəhərində türkdilli ölkələrin musiqi festivalında iştirak edib. Bu günlər Birləşmiş Ştatlarda səfərdə olan rok qrupun solisti Məsud Barış Amerikanın Səsinin qonağı olub və “Amerika icmalı” proqramında müsahibəsində ABŞ-a səfəri, rok musiqisi və gələcək planlarından danışıb.

“Tatarıstanda konsertlərdən sonra Türkiyəyə də turnedə olduq. Türkdilli və azərbaycanlı, eləcə də dünyanın hər yerində olan dostlarımızla musiqimizi paylaşa bilməyimizə çox sevinirik, onlarla görüşüb, konsertlər verməyi sevirik. Bu ölkələrdən biri də Amerikadır, çünki burada çox sayda İran azərbaycanlı həmyerlilərimiz, türkdilli qardaşlarımız var. Onlara konsertlər vermək istəyirik. Burada da üç konsertimiz olacaq, ona görə Amerikaya səfər etmişəm”-deyə Məsud Barış bildirib.

Təbrizli musiqiçi Bakıda Azərbaycan Dövlət konservatoriyasında klassik vokal sənəti üzrə təhsili alıb. O, rok musiqisinə üz tutmasını Azərbaycanda bu janrın daha az yayılması və rok vasitəsilə ictimai mövzulara diqqət çəkmək istəyi ilə izah edib. “Klassik musiqimiz çox zəngindir, muğam musiqisi olduqca zəngindir, amma rok janrı istər Bakıda, istərsə də Təbrizdə çox inkişaf etməyib. Rok ciddi musiqidir, etiraz musiqisidir. Bu musiqi vasitəsilə dövrümüzdə insanlara, insaniyyətə olan haqsızlara qarşı çıxmaq, azadlıqlardan danışmaq daha yaxşı mümkün olur.”

Məsud Barış İran Azərbaycanında gənclərin, yeni nəslin nümayəndələrinin rok musiqisini böyük rəğbətlə qarşıladığını deyib: ”Bir tərəfdən bu janra elə buna görə üz tuturuq. Muğamatımız, klassik musiqisimiz həqitətən də çox zəngindir. Amma bir gerçəkliyi də qəbul etməliyik ki, yeni nəsillə yaxşı əlaqə yarada bilmirik.”